ന്യൂഡല്‍ഹി: 20 രൂപയുടെ നാണയമിറക്കാന്‍ കേന്ദ്ര ധനകാര്യ മന്ത്രാലയത്തിന്‍റെ തീരുമാനം. 12 കോണുകളുള്ള (dodecagon) രൂപത്തിലായിരിക്കും നാണയം. ഇത് സംബന്ധിച്ച്‌ കേന്ദ്ര ധനമന്ത്രാലയം പുറത്തിറക്കിയ ഉത്തരവിലാണ്‌ പുതിയ നാണയത്തെക്കുറിച്ചുള്ള വിവരങ്ങള്‍.
രണ്ടു നിറത്തിലാകും 27 മില്ലീ മീറ്റര്‍ നീളത്തിലുള്ള നാണയം പുറത്തിറങ്ങുക. നാണയത്തിന്‍റെ പുറത്തുള്ള വൃത്തം 65 ശതമാനം ചെമ്ബും 15 ശതമാനം സിങ്കും 20 ശതമാനം നിക്കലും ഉപയോഗിച്ചാവും നിര്‍മിക്കുക. നടുവിലെ ഭാഗത്തിന് 75 ശതമാനം ചെമ്ബും 20 ശതമാനം സിങ്കും അഞ്ച് ശതമാനം നിക്കലും ഉപയോഗിക്കും. 10 രൂപ നാണയം ഇറങ്ങി 10 വര്‍ഷം തികയുന്ന സമയത്താണ് പുതിയ 20 രൂപ നാണയമിറക്കാനുള്ള സര്‍ക്കാര്‍ തീരുമാനം. നോട്ടുകളെ അപേക്ഷിച്ച്‌ നാണയങ്ങള്‍ ദീര്‍ഘകാലം നിലനില്‍ക്കുമെന്ന വിലയിരുത്തലിലാണ് നാണയം പുറത്തിറക്കുന്നതെന്ന് റിസര്‍വ് ബാങ്ക് വൃത്തങ്ങള്‍ അറിയിച്ചു.
