ന്യൂഡല്‍ഹി : സൈനികര്‍ക്ക് ദീപാവലി സമ്മാനമായി ടെലികോം മന്ത്രാലയം കോള്‍ നിരക്കുകള്‍ കുറച്ചു. സാറ്റലൈറ്റ് സംവിധാനം വഴി വീട്ടുകാരോടും മറ്റും സംസാരിക്കാന്‍ വന്‍ നിരക്കായിരുന്നു ഇതുവരെ ഈടാക്കിയിരുന്നത്. നാളെ മുതല്‍ ഒരു മിനിറ്റിന് ഒരു രൂപയെന്ന നിരക്കാണ് ഈടാക്കുക. നിങ്ങളുടെ പ്രിയപ്പെട്ടവരോടു കൂടുതല്‍ നേരം സംസാരിക്കാന്‍ കോള്‍ നിരക്കുകള്‍ കുറയ്ക്കുകയാണെന്ന് ടെലികോം മന്ത്രി മനോജ് സിന്‍ഹ അറിയിച്ചു. ഡിജിറ്റല്‍ സാറ്റലൈറ്റ് ഫോണ്‍ ടെര്‍മിനല്‍ (ഡിഎസ്പിടി) വഴിയുള്ള ഫോണ്‍വിളികള്‍ക്ക് മാസം 500 രൂപയും അധികം വരുന്ന ഓരോ മിനിറ്റിനും അഞ്ചു രൂപയും നല്‍കണമായിരുന്നു. ഇതിനാണ് മാറ്റം വരുത്തി ഓരോ മിനിറ്റിനും ഒരു രൂപയെന്ന പുതിയ നിരക്ക് പ്രഖ്യാപിച്ചിട്ടുള്ളത്. നാളെ മുതല്‍ ഇതു പ്രാബല്യത്തില്‍ വരും. മാസം 500 രൂപയെന്നതും സര്‍ക്കാര്‍ റദ്ദാക്കിയിട്ടുണ്ട്.
