തിരുവനന്തപുരം: മാറാനല്ലൂരില്‍ ബിജെപിയുടെ കൊടി മരം ഒടിച്ച എഎസ്ഐയ്ക്കു സസ്പെന്‍ഷന്‍. മാറാനല്ലൂര്‍ എഎസ്ഐ സുരേഷിനെയാണ് അന്വേഷണ വിധേയമായി സസ്പെന്‍ഡ് ചെയ്തത്. സുരേഷ് കൊടിമരം ഒടിക്കുന്നതിന്റെ വീഡിയോ ദൃശ്യങ്ങള്‍ പുറത്തു വന്നതോടെയാണ് നടപടിയിലേക്കു നീങ്ങിയത്.
ബിജെപി-സിപിഎം സംഘര്‍ഷത്തിന്റെ പേരില്‍ കഴിഞ്ഞ ദിവസം പ്രദേശത്തെ സിപിഎം-ബിജെപി കൊടിതോരണങ്ങളും ഫ്ളക്സ് ബോര്‍ഡുകളും പരക്കെ നശിപ്പിക്കപ്പെട്ടിരുന്നു. ഇതിനെ ചൊല്ലി പ്രതിഷേധങ്ങളും സംഘര്‍ഷങ്ങളും അരങ്ങേറുകയും ചെയ്തിരുന്നു.
ബിജെപിയും സിപിഎമ്മും സംഘര്‍ഷങ്ങളുടെ പേരില്‍ പരസ്പരം ആരോപണങ്ങള്‍ ഉന്നയിക്കുന്നതിനിടെയാണ് എഎസ്ഐ സിസിടിവിയില്‍ കുടുങ്ങിയത്. പോലീസ് വാഹനത്തില്‍ അര്‍ധരാത്രി ഊരുട്ടമ്പലം ജംഗ്ഷനില്‍ എത്തിയ എഎസ്ഐ സുരേഷ് ബിജെപിയുടെ കൊടിമരം വളച്ചൊടിക്കുന്ന വീഡിയോയാണ് പുറത്തായിരിക്കുന്നത്. പോലീസ് വാഹനത്തില്‍ യൂണിഫോം അണിഞ്ഞ് സഹപ്രവര്‍ത്തകനൊപ്പം എത്തിയാണ് എഎസ്ഐ ഇതു ചെയ്യുന്നതെന്നും വീഡിയോയില്‍ കാണാം.
