തിരുവനന്തപുരം: തിരുവോണത്തിന് കേരളീയര്‍ക്ക് വാമന ജയന്തി ആശംസിച്ച ബി.ജെ.പി അദ്ധ്യക്ഷന്‍ അമിത്ഷാ മലയാളികളെ അവഹേളിച്ചിരിക്കുകയാണെന്ന് രമേശ് ചെന്നിത്തല. മനോഹര സങ്കല്പത്തെ ആരു തച്ചുടച്ചാലും മലയാളികള്‍ പൊറുക്കുകയില്ല. അമിത്ഷായുടെ നീക്കം യാദൃച്ഛികമല്ല. ആര്‍.എസ്.എസ് മുഖപത്രത്തില്‍ നേരത്തെ ഓണത്തെ വാമനജയന്തിയായി ചിത്രീകരിച്ച്‌ ലേഖനം പ്രസിദ്ധീകരിച്ചിരുന്നു. മലയാളികള്‍ ഈ നീക്കം പുച്ഛിച്ച്‌ തള്ളുമെന്നും അദ്ദേഹം പറഞ്ഞു.
ചെന്നിത്തലയുടെ ഫെയ്സ്ബുക്ക് പോസ്റ്റ്:-
തിരുവോണത്തിന് കേരളീയര്‍ക്ക് വാമന ജയന്തി ആശംസിച്ച ബി.ജെ.പി അദ്ധ്യക്ഷന്‍ അമിത്ഷാ മലയാളികളെ അവഹേളിച്ചിരിക്കുകയാണ്.മലയാളികളുടെ പരമ്ബരാഗതമായ തിരുവോണ സങ്കല്പത്തെ അട്ടിമറിച്ച്‌ ഓണത്തേയും സവര്‍ണ്ണവത്ക്കരിക്കാനുള്ള ഗൂഢശ്രമമാണ് ഇതിന് പിന്നില്‍. കള്ളവും ചതിയുമില്ലാത്ത ഒരു മാതൃകാ ലോകം സൃഷ്ടിച്ച്‌ ഭരണം നടത്തിയിരുന്ന പ്രജാവത്സലനായിരുന്ന മഹാബലി ചക്രവര്‍ത്തി വര്‍ഷത്തിലൊരിക്കല്‍ തന്റെ പ്രജകളെ കാണാനെത്തുന്ന സുദിനമെന്ന നിലയ്ക്കാണ് മലയാളികള്‍ തിരുവോണമാഘോഷിക്കുന്നത്. ആ മനോഹര സങ്കല്പത്തെ ആരു തച്ചുടച്ചാലും മലയാളികള്‍ പൊറുക്കുകയില്ല. അമിത്ഷായുടെ നീക്കം യാദൃച്ഛികമല്ല. ആര്‍.എസ്.എസ് മുഖപത്രത്തില്‍ നേരത്തെ ഓണത്തെ വാമനജയന്തിയായി ചിത്രീകരിച്ച്‌ ലേഖനം പ്രസിദ്ധീകരിച്ചിരുന്നു. മലയാളികള്‍ ഈ നീക്കം പുച്ഛിച്ച്‌ തള്ളും.
