ജില്ലാ ലൈബ്രറി കൗണ്‍സില്‍ വികസന സമിതി സംഘടിപ്പിക്കുന്ന പുസ്തകോത്സവത്തിന്റെ ഭാഗമായി സംഘാടക സമിതി ഓഫീസ് പ്രവര്‍ത്തനമാരംഭിച്ചു. ജില്ലാ ലൈബ്രറി കൗണ്‍സില്‍ ഓഫീസില്‍ മുന്‍ എംപി പി.കരുണാകരന്‍ ഉദ്ഘാടനം ചെയ്തു. സപ്തംബര്‍ 17,18,19 തീയതികളില്‍ കാഞ്ഞങ്ങാട് അലാമിപ്പള്ളി പുതിയ ബസ് സ്റ്റാന്റ് പരിസരത്താണ് പുസ്തകോത്‌സവം നടക്കുക. പ്രശസ്ത നോവലിസ്റ്റ് എം.മുകുന്ദന്‍ പുസ്തകോത്സവത്തിന്റെ ഉദ്ഘാടനം നിര്‍വഹിക്കും.
സംസ്ഥാനത്തിന്റെ വിവിധ ഭാഗങ്ങളില്‍ നിന്നുള്ള 45 പ്രസാധകരുടെ 80 ഓളം പുസ്തക സ്റ്റാളുകള്‍ മേളയിലുണ്ടാകും. പുസ്തകോത്സവത്തിന്റെ ഭാഗമായി ചരിത്രഗാഥ, പുസ്തക പ്രകാശനം, ലൈബ്രറി പ്രവര്‍ത്തക സംഗമം, ചലച്ചിത്ര ഗാനാലാപന മത്സരം, നാടക രാത്രി, വസന്ത ഗീതങ്ങള്‍, കഥാപ്രസംഗം തുടങ്ങിയ പരിപാടികള്‍ നടക്കും.
ജില്ലാ ലൈബ്രറി കൗണ്‍സില്‍ സെക്രട്ടറി ഡോ.പി പ്രഭാകരന്‍ അധ്യക്ഷനായിരുന്നു. ഗ്രന്ഥാലോകം ചീഫ് എഡിറ്റര്‍ പി.വി.കെ പനയാല്‍, ഡോ.വിനോദ് കുമാര്‍ പെരുമ്പള, സി.വി.വിജയരാജ്, പി.വി.ദിനേശന്‍, പപ്പന്‍ കുട്ടമത്ത് ,ജി.അംബുജാക്ഷന്‍, സുനില്‍ പട്ടേന എന്നിവര്‍ സംസാരിച്ചു. പ്രോഗ്രാം കമ്മിറ്റി കണ്‍വീനര്‍ പി.വേണുഗോപാലന്‍ സ്വാഗതവും ലൈബ്രറി കൗണ്‍സില്‍ ജില്ലാ ജോയന്റ് ടി.രാജന്‍ നന്ദിയും പറഞ്ഞു.
