മൊഹാലി • ന്യൂസീലന്‍ഡിനെതിരായ മൂന്നാം ഏകദിനത്തില്‍ ഇന്ത്യയ്ക്ക് 286 റണ്‍സ് വിജയലക്ഷ്യം. തുടര്‍ച്ചയായ മൂന്നാം മല്‍സരത്തിലും ടോസ് നഷ്ടപ്പെട്ട് ബാറ്റിങ്ങിനിറങ്ങിയ ന്യൂസീലന്‍ഡ് 49.4 ഓവറില്‍ 285 റണ്‍സിന് എല്ലാവരും പുറത്തായി. അര്ധസെഞ്ചുറി നേടിയ ഓപ്പണര്‍ ടോം ലാതം (61), ജയിംസ് നീഷാം (57) എന്നിവരാണ് കിവീസിന് മാന്യമായ സ്കോര്‍ സമ്മാനിച്ചത്. റോസ് ടെയ്ലര്‍ 44 റണ്‍സെടുത്തു. രണ്ടിന് 152 എന്ന നിലയില്‍നിന്ന് എട്ടിന് 199 റണ്‍സ് എന്ന നിലയിലേക്ക് തകര്‍ന്ന കിവീസിനെ ഒന്‍പതാം വിക്കറ്റില്‍ തകര്‍പ്പന്‍ പ്രകടനവുമായി അര്ധസെഞ്ചുറി കൂട്ടുകെട്ട് (84) തീര്‍ത്ത നീഷാം-മാറ്റ് ഹെന്‍റി സഖ്യമാണ് 280 കടത്തിയത്. ഹെന്‍റി 37 പന്തില്‍ 39 റണ്‍സെടുത്ത് പുറത്താകാതെ നിന്നു.ഇന്ത്യയ്ക്കായി കേദാര്‍ യാദവ്, ഉമേഷ് യാദവ് എന്നിവര്‍ മൂന്നും അമിത് മിശ്ര, ജസ്പ്രീത് ബുംറ എന്നിവര്‍ രണ്ടുവിക്കറ്റ് വീതവും വീഴ്ത്തി. അ‍ഞ്ച് മല്‍സരങ്ങളടങ്ങിയ പരമ്ബരയില്‍ ഇരു ടീമുകളും ഓരോ മല്‍സരം വിജയിച്ച്‌ സമാസമം നില്‍ക്കുകയാണ്.
