തിരുവനന്തപുരം• ഹൈക്കോടതിക്ക് മുന്നില്‍ മാധ്യമപ്രവര്‍ത്തകരും അഭിഭാഷകരും തമ്മിലുണ്ടായ സംഘര്‍ഷത്തേക്കുറിച്ച്‌ അന്വേഷിക്കാന്‍ സംസ്ഥാന സര്‍ക്കാര്‍ ജുഡീഷ്യന്‍ കമ്മിഷനെ നിയോഗിച്ചു. ഇന്നുചേര്‍ന്ന മന്ത്രിസഭാ യോഗത്തിലാണ് തീരുമാനം. റിട്ട. ജസ്റ്റിസ് പി.എ. മുഹമ്മദാകും സംഭവം അന്വേഷിക്കുക. ഇക്കഴിഞ്ഞ ജൂലൈ 20-ാം തീയതിയാണ് ഹൈക്കോടതിക്ക് മുന്നില്‍ മാധ്യമപ്രവര്‍ത്തകരും അഭിഭാഷകരും തമ്മില്‍ സംഘര്‍ഷമുണ്ടായത്. തുടര്‍ന്ന് പൊലീസ് ലാത്തിചാര്‍ജ് നടത്തിയിരുന്നു. ഇതുമായി ബന്ധപ്പെട്ട സംഭവങ്ങളേക്കുറിച്ചാണ് കമ്മിഷന്‍ അന്വേഷിക്കുക. 1952-ലെ കമ്മീഷന്‍ ഓഫ് എന്‍ക്വയറി ആക്‌ട് പ്രകാരമാകും അന്വേഷണം. ജഡ്ജിമാരുടെ ലഭ്യതക്കുറവു കാരണം സിറ്റിങ് ജഡ്ജിയുടെ സേവനം ലഭ്യമാക്കാന്‍ കഴിയില്ലെന്ന് ഹൈക്കോടതി അറിയിച്ചതിനെ തുടര്‍ന്നാണ് റിട്ട.ജസ്റ്റിസിനെ നിയമിച്ചത്.
