ന്യൂഡല്‍ഹി: അധോലോക നായകന്‍ ദാവൂദ് ഇബ്രാഹിമിന്‍റെ സംഘാംഗമായ മലയാളിയെ ഡല്‍ഹിയില്‍ ദേശീയ അന്വേണ ഏജന്‍സി (എന്‍ഐഎ) അറസ്റ്റ് ചെയ്തു. കള്ളനോട്ട സംഘത്തില്‍പ്പെട്ട പൊടി സലാം എന്ന അബ്ദുല്‍ സലാം ആണ് പിടിയിലായത്. മലപ്പുറം സ്വദേശിയായ ഇദ്ദേഹത്തെ ഡല്‍ഹി അന്താരാഷ്ട്ര വിമാനത്താവളത്തില്‍ നിന്നുമാണ് എന്‍ഐഎ അറസ്റ്റ് ചെയ്തത്.2014 ല്‍ നെടുന്പാശ്ശേരി എയര്‍പോര്‍ട്ടില്‍ ഒന്പത് ലക്ഷം രൂപയുടെ കള്ളനോട്ട് പിടികൂടിയ കേസിലെ പ്രതിയാണ് അബ്ദുല്‍ സലാം. സൗദി അറേബ്യയില്‍നിന്ന് ഡല്‍ഹിയില്‍ ഇറങ്ങവെയാണ് ഇയാളെ എന്‍ഐഎ പിടികൂടുന്നത്. ഇയാളെ സൗദി നാടുകടത്തിയതായെന്നാണ് റിപ്പോര്‍ട്ട്. പാക്കസ്താനില്‍ നിന്നും ഗള്‍ഫ് വഴി ഇന്ത്യയിലേക്ക് കള്ളനോട്ടുകള്‍ കടത്തുന്ന സംഘത്തിലെ പ്രധാന കണ്ണിയിലൊരാളാണ് ഇയാള്‍. ദാവൂദ് ഇബ്രാഹിമിന്‍റെ വലംകയ്യായ അഫ്താബ് ബക്തിയുമായി അടുത്ത ബന്ധം പുലര്‍ത്തുന്ന ആളാണ് അബ്ദുല്‍ സലാമെന്ന് കള്ളനോട്ട് കേസില്‍ എന്‍ഐഎ രജിസ്റ്റര്‍ ചെയ്ത കുറ്റപത്രത്തില്‍ പറയുന്നു.
