വിഷിംഗ്ടണ്‍: മെക്സിക്കന്‍ അതിര്‍ത്തിയില്‍ മതില്‍ നിര്‍മിക്കുന്നതിനുള്ള ഉത്തരവില്‍ യുഎസ് പ്രസിഡന്‍റ് ഡോണള്‍ഡ് ട്രംപ് ഒപ്പുവച്ചു. അനധികൃത കുടിയേറ്റം തടയുന്നതിനു മതില്‍ നിര്‍മാണത്തിനുള്ള ഘടന രൂപകല്‍പന ചെയ്യാനായി ഫഡറല്‍ ഫണ്ടിന് നിര്‍ദേശം നല്‍കുന്ന ഉത്തരവിലാണ് ബുധനാഴ്ച ട്രംപ് ഒപ്പുവച്ചത്. ദേശീയ സുരക്ഷയ്ക്കു ഭീഷണിയാണെന്നു ട്രംപ് ഭരണകൂടം കരുതുന്ന സിറിയ, ഇറാന്‍, ഇറാഖ്, ലിബിയ, യെമന്‍, സുഡാന്‍, സൊമാലിയ തുടങ്ങിയ മുസ്ലീം രാജ്യങ്ങളില്‍നിന്നുള്ള അനധികൃത കുടിയേറ്റക്കാരെയും ഉത്തരവ് ബാധിക്കും.
ദേശീയ സുരക്ഷ സംബന്ധിച്ച ഉത്തരവുകള്‍ ഉടന്‍ പുറത്തിറക്കുമെന്ന് ചൊവ്വാഴ്ച ട്രംപ് ട്വീറ്റ് ചെയ്തിരുന്നു. കുടിയേറ്റക്കാരെ പുറത്താക്കുന്നതില്‍ വിസമ്മതം പ്രകടിപ്പിച്ച ചില നഗരങ്ങളെ ലക്ഷ്യമിട്ടാണ് ട്രംപിന്റെ പുതിയ ഉത്തരവുകള്‍. അനധികൃത കുടിയേറ്റം തടയുമെന്നു തെരഞ്ഞെടുപ്പു പ്രചാരണവേളയില്‍ ട്രംപ് പറഞ്ഞിരുന്നു. ഇതിന്‍റെ ചെലവ് മെക്സിക്കോയില്‍നിന്ന് ഈടാക്കുമെന്നും അദ്ദേഹം വ്യക്തമാക്കിയിരുന്നു. 3200 കിലോമീറ്ററാണ് ഇരുരാജ്യങ്ങളും തമ്മിലുള്ള അതിര്‍ത്തിയുടെ ദൈര്‍ഘ്യം. ഇതില്‍ പലേടത്തും ഇപ്പോള്‍ തന്നെ സുരക്ഷാവേലികളും ചെക്കുപോസ്റ്റുകളുമുണ്ട്. മെക്സിക്കോയില്‍നിന്നു പണം ഈടാക്കാനുള്ള ട്രംപിന്റെ നീക്കം അനുവദിക്കില്ലെന്നു മെക്സിക്കന്‍ അധികൃതര്‍ പലവട്ടം വ്യക്തമാക്കിയിട്ടുണ്ട്.
