ഷിംല: ഹിമാചല്‍ തലസ്ഥാനമായ ഷിംലയില്‍നിന്ന് 125 കിലോമീറ്റര്‍ അകെല റാംപുറില്‍ ബസ്സ് കൊക്കയിലേക്ക് മറിഞ്ഞ് മുപ്പതു പേര്‍ മരിച്ചു. രാവിലെ 9.15 ഓടെയായിരുന്നു അപകടം സോളാനില്‍ നിന്ന് കിന്നൗറിലേക്ക് പോവുകയായിരുന്ന സ്വകാര്യ ബസാണ് അപകടത്തില്‍ പെട്ടത്. അറുപതോളം ആളുകള്‍ ബസ്സിലുണ്ടായിരുന്നു. അപകടസ്ഥലത്തേക്ക് രക്ഷാപ്രവര്‍ത്തകരെ അയച്ചതായും പ്രവര്‍ത്തനങ്ങള്‍ പുരോഗമിക്കുന്നതായും ഷിംല ഡെപ്യൂട്ടി കമ്മിഷണര്‍ രോഹന്‍ ചന്ദ് താക്കൂര്‍ അറിയിച്ചു. പരുക്കേറ്റവരെ ആശുപത്രിയില്‍ പ്രവേശിപ്പിച്ചു. മരണസംഖ്യ ഇനിയും ഉയര്‍ന്നേക്കാമെന്ന് പോലീസ് സൂചിപ്പിച്ചു. ഏകദേശം 200 മീറ്റര്‍ ഉയരത്തില്‍ നിന്നാണ് ബസ് മറിഞ്ഞത്.
