മക്ക : ഇന്ത്യയില്‍ നിന്നുള്ള ഹാജിമാരുടെ ആദ്യ സംഘം ഇന്ന് മക്കയില്‍ എത്തും. ജൂലൈ 14 ന് മദീനയില്‍ എത്തിയ ആദ്യ സംഘത്തിലുള്ളവരാണ് എട്ടു ദിവസത്തെ സന്ദര്‍ശനം പൂര്‍ത്തിയാക്കി രാവിലെ മക്കയിലേക്ക് തിരിക്കുക. ഇന്ത്യയില്‍ നിന്നും ഇതിനകം 32,512 ഹാജിമാര്‍ മദീനയില്‍ എത്തിയിട്ടുണ്ട്. ഹജ്ജ് ഓപറേഷന്‍ കമ്ബനികള്‍ (മുതവിഫ് ) നല്‍കുന്ന പ്രത്യേക ബസുകളിലാണ് ഹാജിമാരെ കൊണ്ടുവരുന്നത്. ബസുകളില്‍ തികയാതെ വരുന്ന ബാഗേജുകള്‍ എത്തിക്കാന്‍ പ്രത്യേക ഡൈന വാഹനങ്ങള്‍ ഹജ്ജ് മിഷന്‍ ഏര്‍പ്പെടുത്തിയിട്ടുണ്ട്.
മക്കയിലെ തയ്യാറെടുപ്പുകളെല്ലാം പൂര്‍ത്തിയായിട്ടുണ്ട്. 14 ബ്രാഞ്ചുകളിലായാണ് ഹാജിമാര്‍ക്ക് താമസം ഒരുക്കിയത്. അസീസിയയില്‍ 40 കിടക്കകളുള്ള ആശുപത്രിയും ഗ്രീന്‍ കാറ്റഗറിയില്‍ പത്തുകിടക്കകളുള്ള ആശുപത്രിയും തയാറായിട്ടുണ്ട്. കൂടാതെ ഓരോ ബ്രാഞ്ചിലും ഓരോ ഡിസ്പെന്‍സറി വീതവും ഉണ്ട്. അസീസിയയിലെയും ഹറം പരിസരത്തെയും ഹാജിമാര്‍ക്ക് താമസിക്കുന്ന കെട്ടിടം പെട്ടെന്ന് കണ്ടെത്താന്‍ പ്രത്യേക മാപ്പും പുറത്തിറക്കി. തിങ്കളാഴ്ച എത്തുന്ന ആദ്യ സംഘം തീര്‍ഥാടകര്‍ക്ക് ബ്രാഞ്ച് 1, 5, 13, 14 ലെ (അസീസിയ ബില്‍ഡിങ് 23, 25, 193, 195, 191, 202, 210, 247, 104, 145, 65, 64, 205 & ഗ്രീന്‍ കാറ്റഗറി യില്‍ ബില്‍ഡിങ് 644, 648, 660) ആയി ആണ് താമസം ഒരുക്കിയത്.
അസീസിയയില്‍ നിന്നും ഹാജിമാരെ ഹറമിലേക്കും തിരിച്ചും എത്തിക്കാനായി 24 മണിക്കൂര്‍ ബസ് സര്‍വിസ് ഇന്നുമുതല്‍ ആരംഭിക്കും. 200 ഹാജിമാര്‍ക്ക് ഒരു ബസ് എന്ന അനുപാതത്തിലാകും സര്‍വീസ്.
