തിരുവനന്തപുരം : ചുറ്റും നടക്കുന്ന കാര്യങ്ങളെക്കുറിച്ചു ശാസ്ത്രീയ കാഴ്ചപ്പാടോടെ അന്വേഷണം നടത്തുന്നവരാകണം വിദ്യാര്‍ഥികളെന്ന് വൈദ്യുതി മന്ത്രി എം.എം. മണി. പ്രപഞ്ച പ്രതിഭാസങ്ങളോടുള്ള ചോദ്യങ്ങളും അവയ്ക്ക് ഉത്തരങ്ങളും കണ്ടെത്തപ്പെട്ടതാണ് ആധുനിക ലോകത്തിലെ പല കണ്ടുപിടിത്തങ്ങളെന്നും അദ്ദേഹം പറഞ്ഞു. പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി സ്‌കൂളുകളില്‍ നിര്‍മിക്കുന്ന ശാസ്ത്ര പാര്‍ക്കിന്റെ ജില്ലാതല ഉദ്ഘാടനം തൈക്കാട് മോഡല്‍ ബോയ്‌സ് എച്ച്.എസ്.എസില്‍ നിര്‍വഹിക്കുകയായിരുന്നു മന്ത്രി.
മാനവരാശിക്ക് ഉത്തരം കാണാന്‍ കഴിയാത്ത പല പ്രതിഭാസങ്ങളും ഇപ്പോഴും പ്രപഞ്ചത്തിലുണ്ട്. വരുംതലമുറ അതിന് ഉത്തരം കണ്ടെത്തും. അതിനു വിദ്യാര്‍ഥികളെ പ്രാപ്തരാക്കുന്നതിനാണു സമഗ്രമായ ശാസ്ത്ര വിദ്യാഭ്യാസം വിദ്യാലങ്ങളില്‍ ഒരുക്കുന്നത്. സ്‌കൂള്‍ ശാസ്ത്ര പാര്‍ക്ക് പോലുള്ള പദ്ധതികള്‍ ഇതിനു മുതല്‍ക്കൂട്ടാകുമെന്നും മന്ത്രി പറഞ്ഞു.
