ലണ്ടന്‍:ഇംഗ്ലീഷ് പ്രീമിയര്‍ ലീഗില്‍ നിര്‍ണായക മത്സരത്തില്‍ ന്യൂകാസിലിനോടു സിറ്റി പരാജയപ്പെട്ടു. ഒന്നിനെതിരെ രണ്ടു ഗോളുകള്‍ക്കാണ് പെപ് ഗ്വാര്‍ഡിയോളയും സംഘവും പരാജയപ്പെട്ടത്. ഒരു ഗോളിന് മുന്നിട്ടു നിന്ന ശേഷമാണ് സിറ്റിയുടെ തോല്‍വി. ഒന്നാം മിനിറ്റില്‍ സെര്‍ജിയോ അഗ്വേറോ നേടിയ ഗോള്‍ ആണ് സിറ്റിയെ മുന്നില്‍ എത്തിച്ചത്. എന്നാല്‍ 66-ാം മിനിറ്റില്‍ സലോമോന്‍ റോന്‍ഡോനിലൂടെ ന്യൂകാസില്‍ ഒപ്പം എത്തി. 80-ാം ലഭിച്ച പെനാല്‍റ്റി ന്യൂകാസിലിന് ലീഡും നല്‍കി. മാറ്റ് റിചിയായിരുന്നു പന്ത് വലയിലാക്കിയത്. പോയിന്‍റ് പട്ടികയില്‍ രണ്ടാം സ്ഥാനത്തുള്ള സിറ്റിക്ക് ഈ തോല്‍വി വലിയ തിരിച്ചടിയായി. ഒന്നാമതുള്ള ലിവര്‍പൂള്‍ അടുത്തദിവസം ജയിക്കുകയാണെങ്കില്‍ ലീഡ് വ്യത്യാസം കൂടും.
