കോട്ടയം: പാലാ ഉപതെരഞ്ഞെടുപ്പില്‍ ഭന്നതകള്‍ മറന്ന് യുഡിഎഫ് സ്ഥാനാര്‍ഥിയുടെ വിജയത്തിനായി സജീവമായി പ്രചാരണത്തിനിറങ്ങുമെന്ന് പി.ജെ.ജോസഫ്. കേരള കോണ്‍ഗ്രസ്-എമ്മിലെ തര്‍ക്കം പരിഹരിക്കാന്‍ യുഡിഎഫ് ഉപസമിതി വിളിച്ച അനുനയ ചര്‍ച്ച നിലപാട് മയപ്പെടുത്തിയതിനു പിന്നാലെയാണ് അത് ജോസഫ് തന്നെ മാധ്യമങ്ങളോട് വ്യക്തമാക്കിയത്.അതിനുള്ള അനുകൂല സാഹചര്യം ഒരുക്കുമെന്ന് യുഡിഎഫ് നേതൃത്വം ഉറപ്പ് നല്‍കിയിട്ടുണ്ടെന്നും ജോസഫ് പറഞ്ഞു. നേരത്തെ, പാലായില്‍ ഒറ്റയ്ക്കുള്ള പ്രചാരണമെന്ന രീതിയില്‍ നിന്ന് പിന്മാറുന്നുവെന്ന് ജോസഫ് വിഭാഗത്തെ പ്രതിനിധീകരിച്ച്‌ ചര്‍ച്ചയ്ക്കെത്തിയ മോന്‍സ് ജോസഫ് എംഎല്‍എ പറഞ്ഞിരുന്നു. അനുനയ ചര്‍ച്ചയ്ക്കു ശേഷം മാധ്യമങ്ങളോട് പ്രതികരിക്കുകയായിരുന്നു മോന്‍സ്.
