തിരുവനന്തപുരം: കൊറോണ വൈറസ് ബാധയുമായി ബന്ധപ്പെട്ട് സംസ്ഥാനത്ത് 80 പേര്‍ നിരീക്ഷണത്തിലെന്ന് റിപ്പോര്‍ട്ട്. എണ്‍പതുപേരില്‍ പനിയുടെ ലക്ഷണങ്ങളുള്ള ഏഴു പേരാണ് ആശുപത്രികളില്‍ നിരീക്ഷണത്തിലുള്ളത്. മറ്റുള്ളവരെ വീടുകളില്‍ തന്നെ നിരീക്ഷണത്തില്‍ വച്ചിരിക്കുകയാണ്. വീടുകളില്‍ നിരീക്ഷണത്തിലുള്ളവരോട് ചൈനയില്‍നിന്നും മടങ്ങിവന്ന ദിവസം മുതല്‍ 28 ദിവസത്തേക്ക് ഇവിടെത്തന്നെ തന്നെ തുടരാനാണ് നിര്‍ദേശിച്ചിരിക്കുന്നത്.
നിലവില്‍ ആശങ്കപ്പെടേണ്ട സാഹചര്യമില്ലെന്ന് ആരോഗ്യമന്ത്രി കെ.കെ ശൈലജ നേരത്തെ അറിയിച്ചിരുന്നു. ചൈനയില്‍നിന്നും എത്തുന്നവര്‍ പരിശോധനയ്ക്ക് എത്തണമെന്ന് ആരോഗ്യവകുപ്പ് നിര്‍ദേശം നല്‍കിയിട്ടുണ്ട്.
മെഡിക്കല്‍ കോളജുകളിലും ജില്ലയിലെ പ്രധാന ജനറല്‍ ആശുപത്രികളിലും ഐസൊലേഷന്‍ വാര്‍ഡുകള്‍ തയാറാക്കാന്‍ നിര്‍ദേശം നല്‍കിയിട്ടുണ്ട്. എല്ലാ ആശു പത്രികളിലും അണുനശീകരണ പ്രവര്‍ത്തനങ്ങള്‍ ഊര്‍ജിതമാക്കേണ്ടതാണെന്നും മന്ത്രി നിര്‍ദേശം നല്‍കി.
സുരക്ഷാ കവചങ്ങള്‍, കൈയുറ, മാസ്ക് തുടങ്ങിയ സുരക്ഷാ ഉപകരണങ്ങള്‍, മരുന്നുകള്‍ എന്നിവ ലഭ്യമാക്കാന്‍ കെഎംഎസ്‌സിഎലിനെ ചുമതലപ്പെടുത്തിട്ടു ണ്ടെന്നും രോഗലക്ഷണങ്ങള്‍ ഉള്ളവരുടെ സാംപിളുകള്‍ വൈറോളജി ലാബിലേക്ക് അയക്കാന്‍ നിര്‍ദേശം നല്‍കിയിട്ടുണ്ടെന്നും ആരോഗ്യമന്ത്രി അറിയിച്ചു
