കോട്ടയം• പൊന്‍കുന്നം- പാലാ ഹൈവേയില്‍ ശബരിമല തീര്‍ഥാടകര്‍ സഞ്ചരിച്ച വാഹനം അപകടത്തില്‍പ്പെട്ട് ഒന്‍പതു പേര്‍ക്കു പരുക്ക്. ഇന്നു പുലര്‍ച്ചെ എലിക്കുളം പഞ്ചായത്ത് ഓഫിസിനു സമീപമാണ് അപകടം. മൂകാംബികയില്‍നിന്നു ശബരിമലക്കു തീര്‍ഥാടകരുമായി എത്തിയ വാനാണ് അപകടത്തില്‍പ്പെട്ടത്. റോഡരികില്‍ നിന്ന വൈദ്യുതി പോസ്റ്റും സിഗ്നല്‍ ലൈറ്റുകളും തകര്‍ത്ത വാന്‍ സമീപമുള്ള വീടിന്റെ മതിലിലിടിച്ചാണു നിന്നത്. മുന്‍വശം പൂര്‍ണമായും തകര്‍ന്ന വാനില്‍നിന്ന് അപകടത്തില്‍പ്പെട്ടവരെ വാഹനം വെട്ടിപ്പൊളിച്ചാണു പുറത്തെടുത്തത്. അപകടത്തില്‍ സാരമായി പരുക്കേറ്റ തീര്‍ഥാടകരായ സുരേഷ്(45), സന്തോഷ്(44) എന്നിവരെ കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. പരുക്കേറ്റ സുരേഷിന്റെ മകന്‍ ശബരീഷ്, ദിനേശ്, ശിവറാം, മഞ്ജുനാഥ്, ദീക്ഷിദ്, ശിശില്‍ സ്വാമി, ഗീരീഷ് എന്നിവരെ കാഞ്ഞിരപ്പള്ളി ജനറല്‍ ആശുപത്രിയില്‍ പ്രവേശിപ്പിച്ചു. ഡ്രൈവര്‍ ഉറങ്ങിപ്പോയതാകാം അപകട കാരണമെന്നാണു പൊലീസിന്റെ നിഗമനം. സംഭവമറിഞ്ഞ് കാഞ്ഞിരപ്പള്ളിയില്‍നിന്നു ഫയര്‍ഫോഴ്സും ആംബുലന്‍സും അപകടസ്ഥലത്ത് എത്തിയിരുന്നു.
