ന്യൂഡല്‍ഹി: ഡല്‍ഹിയിലെ ആലിപൂരിലുണ്ടായ കാറപകടത്തില്‍ നോയിഡ അമിറ്റി സര്‍വകലാശാലയിലെ മൂന്ന് വിദ്യാര്‍ത്ഥികള്‍ മരിച്ചു. ഏഴു വിദ്യാര്‍ഥികള്‍ക്ക് പരിക്കേറ്റു. മീറഠ് സ്വദേശി ശിക്കാര്‍ ബിവാനി സ്വദേശികളായ ഉജ്വല്‍, രാജേഷ് എന്നിവരാണ് മരിച്ചത്. അമിറ്റി സ്വകാര്യ സര്‍വകലാശാലയിലെ രണ്ടാം വര്‍ഷ ബി.ടെക് വിദ്യാര്‍ഥികളാണിവര്‍. ഹരിയാണയിലെ മുര്‍ത്താലിലേക്കു പോവുകയായിരുന്ന കാര്‍ ഇഷ്ടിക കയറ്റിയ ട്രാക്ടറിലേക്ക് ഇടിച്ചു കയറുകയായിരുന്നു. ഇടിയുടെ ആഘാതത്തില്‍ വിദ്യാര്‍ഥികള്‍ കാറില്‍ നിന്നു തെറിച്ചു വീഴുകയായിരുന്നെന്ന് ദൃസാക്ഷികള്‍ മാധ്യമങ്ങളോട് പറഞ്ഞു.അപകടത്തിനു ശേഷം ഒളിവില്‍ പോയ ട്രാക്ടര്‍ ഡ്രൈവറെ പോലീസ് തിരയുന്നുണ്ട്. പരിക്കേറ്റ ഏഴു പേരില്‍ രണ്ടു പേരുടെ നില ഗുരുതരമാണ്. ഇവര്‍ ഡല്‍ഹിയിലെ ലോക് നായക് ആസ്പത്രിയില്‍ ചികിത്സയിലാണ്.
