സിഡ്നി : ആഷസ് പരമ്പരയിലെ അഞ്ചാമത്തെയും അവസാനത്തെയും ടെസ്റ്റിന്റെ ഒന്നാം ദിനം ഇംഗ്ലണ്ട് അഞ്ച് വിക്കറ്റിന് 233 റണ്‍സ് എന്ന നിലയില്‍. ക്യാപ്റ്റന്‍ ജോ റൂട്ടിന്റെയും ഡേവിഡ് മലന്റെയും അര്‍ധസെഞ്ചുറികളുടെ മികവില്‍ 228/3 എന്ന ശക്തമായ നിലയിലായിരുന്നു ഇംഗ്ലണ്ട്. എന്നാല്‍ അവസാന ഓവറുകളില്‍ റൂട്ടിനെ(83) മിച്ചല്‍ സ്റ്റാര്‍ക്കും ബെയര്‍സ്റ്റോയെ(5) ഹേസല്‍വുഡും മടക്കിയതോടെ 233/5 എന്ന നിലയില്‍ ആദ്യ ദിനം ഇംഗ്ലണ്ട് ക്രീസ് വിട്ടു.
ടോസ് ജയിച്ച ഇംഗ്ലീഷ് നായകന്‍ റൂട്ട് ബാറ്റിംഗ് തെരഞ്ഞെടുക്കുകയായിരുന്നു. സ്കോര്‍ 28 ല്‍ നില്‍ക്കെ 24 റണ്‍സെടുത്ത ഓപ്പണര്‍ മാര്‍ക്ക് സ്റ്റോണ്‍മാനെ പുറത്താക്കി പാറ്റ് കമ്മിന്‍സ് ഓപ്പണിംഗ് കൂട്ടുകെട്ട് പൊളിച്ചു. പിന്നീടെത്തിയ ജെയിംസ് വിന്‍സ് (25) പിടിനിന്നെങ്കിലും സ്കോര്‍ 88 ല്‍ നില്‍ക്കെ കമ്മിന്‍സ് തന്നെ പുറത്താക്കി. നാലാം ടെസ്റ്റിലെ ഡബിള്‍ സെഞ്ച്വറി വീരന്‍ കുക്ക് 39 റണ്‍സുമായി മടങ്ങി. പിന്നീട് നാലാം വിക്കറ്റില്‍ റൂട്ടും മലനും ചേര്‍ത്ത 133 റണ്‍സാണ് ഇംഗ്ലണ്ട് സ്കോര്‍ 200 കടത്തിയത്.സ്വന്തം സ്കോര്‍ 83 ല്‍ നില്‍ക്കെ റൂട്ടിനെ സ്റ്റാര്‍ക്കാണ് പുറത്താക്കിയത്. ഓസീസിന് വേണ്ടി ഹാസില്‍വുഡും കമ്മിന്‍സും രണ്ട് വിക്കറ്റുകള്‍ വീതം വീഴ്ത്തി.
