തിരുവനന്തപുരം• ഇന്നും നാളെയും ബാങ്കുകള്‍ക്ക് അവധി ആയതിനാല്‍ ക്രിസ്മസിനു പണം കിട്ടാതെ ജനം വലയും. സംസ്ഥാനത്തെ പകുതിയോളം എടിഎമ്മുകളിലേ ഇപ്പോള്‍ പണമുള്ളൂ. ഇന്നലെ പണം നിറച്ച എടിഎമ്മുകള്‍ പലതും രാത്രിയോടെതന്നെ കാലിയായി. സംസ്ഥാനത്ത് എറ്റവും കൂടുതല്‍ എടിഎമ്മുകളുള്ള എസ്ബിടിയുടെ മുക്കാല്‍ പങ്കിലും ശാഖകളാണു പണം നിറയ്ക്കുന്നത്. നോട്ടു പിന്‍വലിക്കല്‍ പ്രഖ്യാപനത്തിനു മുന്‍പു ദിവസേന 250 കോടി രൂപ എടിഎമ്മുകളില്‍ നിറച്ചിരുന്ന എസ്ബിടി ആവശ്യത്തിനു നോട്ടില്ലാത്തതിനാല്‍ ഇപ്പോള്‍ നിറയ്ക്കുന്നതു വെറും 40 കോടി രൂപയാണ്. ഇന്നും നാളെയും പണം എടിഎമ്മുകളില്‍ ഉണ്ടാകില്ലെന്നു മിക്ക ബാങ്കുകളും രഹസ്യമായെങ്കിലും സമ്മതിക്കുന്നു. ക്ഷാമമില്ലാത്ത 2000 രൂപയാണ് എടിഎമ്മുകളില്‍ ഇപ്പോള്‍ കൂടുതല്‍ ബാങ്കുകളിലും നിറച്ചിരിക്കുന്നത്.
