തിരുവനന്തപുരം: തിരുവനന്തപുരത്ത് രാവിലെ പ്രഭാതസവാരിക്ക് ഇറങ്ങിയവര്‍ക്ക് നേരേ തെരുവില്‍ ബൈക്കിലെത്തിയ അജ്ഞാത സംഘത്തിന്റെ ആക്രമണം. സ്ത്രീകള്‍ ഉള്‍പ്പെടെയുള്ളവര്‍ക്ക് നേരെയാണ് ആക്രമണം നടത്തിയത്. വിവരമറിഞ്ഞ് പോലീസ് സ്ഥലത്ത് എത്തിയെങ്കിലും അക്രമികളെ പിടികൂടാന്‍ കഴിഞ്ഞില്ല. സിസിടിവി പരിശോധന നടത്തുകയാണ്. വ്യാഴാഴ്ച പുലര്‍ച്ചെ നാലു മണിക്ക് തിരുവല്ലത്ത് നിന്നും തുടങ്ങിയ ആക്രമണം കരുമം മരുതൂര്‍ക്കടവ്, വഴി ചിറയല്‍ പാലം വരെ ആക്രമണം നടത്തി. രണ്ടു ബൈക്കുകളിലായി സഞ്ചരിച്ച സംഘം റോഡില്‍ ഈ സമയത്ത് കണ്ണില്‍ കണ്ടവരുടെയെല്ലാം അരികിലൂടെ പോകുകയും ഇലക്ട്രിക് വയറും ചെറിയ പൈപ്പും ഉപയോഗിച്ച് അടിക്കുകയുമായിരുന്നു. അടികിട്ടിയതിനെ തുടര്‍ന്ന് ചിലര്‍ പോലീസ് കണ്‍ട്രോള്‍ റൂമില്‍ അറിയിക്കുകയും പോലീസ് സ്ഥലത്തെത്തുകയും ചെയ്‌തെങ്കിലും ആരേയും കുടുക്കാന്‍ കഴിഞ്ഞില്ല. പ്രമുഖ സിനിമാനടന്റെ സഹോദരന്‍ വരെ അടികിട്ടിയവരുടെ നിരയിലുണ്ടന്ന പോലീസ് പറഞ്ഞു.
