കൊച്ചി • മന്ത്രിമാരുടെയും സിപിഎം നേതാക്കളുടെയും ബന്ധുക്കളെയും പാര്‍ശ്വവര്‍ത്തികളെയും ക്രമവിരുദ്ധമായി നിയമിച്ചതില്‍ ഒന്നാം പ്രതി മുഖ്യമന്ത്രി പിണറായി വിജയനാണെന്നു യൂത്ത് കോണ്‍ഗ്രസ് സംസ്ഥാന പ്രസിഡന്റ് ഡീന്‍ കുര്യാക്കോസ്. താല്‍ക്കാലിക നിയമനങ്ങള്‍ മുതലുള്ള എല്ലാ സര്‍ക്കാര്‍ നിയമനങ്ങളും തീരുമാനിക്കുന്നതു സിപിഎം സംസ്ഥാന സെക്രട്ടേറിയറ്റ് കൂടി അറി‍ഞ്ഞു കൊണ്ടാണ്. പി.കെ.ശ്രീമതിയുടെ ഫെയ്സ്ബുക് പോസ്റ്റിലൂടെ മുഖ്യമന്ത്രി പിണറായി വിജയന് ഇക്കാര്യത്തിലുള്ള പങ്ക് വ്യക്തമായിരിക്കുകയാണ്.അഞ്ജു ബോബി ജോര്‍ജിന്റെ സഹോദരന്റെ സ്പോര്‍ട്സ് കൗണ്‍സില്‍ നിയമനത്തിന്റെ കാര്യത്തില്‍ സ്വജനപക്ഷപാതവാദം ഉയര്‍ത്തി അഴിമതി വിരുദ്ധത ഉയര്‍ത്തിയവരാണു നാടു മുഴുവന്‍ അഴിമതിക്കായി പാര്‍ശ്വവര്‍ത്തികളെയും ബന്ധുക്കളെയും തിരുകിക്കയറ്റിയിരിക്കുന്നത്. കുറ്റാരോപിതനായ മന്ത്രി ജയരാജന്‍ രാജിവയ്ക്കണമെന്നാവശ്യപ്പെട്ട് അദ്ദേഹത്തിന്റെ വസതിയിലേക്ക് യൂത്ത് കോണ്‍ഗ്രസ് മാര്‍ച്ച്‌ നടത്തുമെന്നും ഡീന്‍ കുര്യാക്കോസ് പറഞ്ഞു.
