നമ്മുടെ നാടിന് കാലാനുസൃതമായ പുരോഗതി ഉണ്ടാകണമെന്നതാണ് കേരളത്തിലെ പൊതു സമൂഹത്തിന്റെ നിലപാടെന്ന് മുഖ്യമന്ത്രി പിണറായി വിജയന്‍. വിഴിഞ്ഞത്ത് നടന്ന കോവളം മണ്ഡലം നവകേരള സദസ്സിന്റെ ഉദ്ഘാടനം നിര്‍വഹിച്ച് സംസാരിക്കുകയായിരുന്നു അദ്ദേഹം.
2016 നു ശേഷം ആഭ്യന്തര വളര്‍ച്ചാ നിരക്കില്‍ എട്ടു ശതമാനത്തിന്റെ വര്‍ധനവാണ് രേഖപ്പെടുത്തിയത്. തനത് വരുമാനം 2016 ല്‍ ഉള്ളതിനേക്കാള്‍ 41 ശതമാനം വര്‍ധിച്ചു. സര്‍ക്കാര്‍ അധികാരത്തില്‍ വന്നതിനു ശേഷമുള്ള ഏഴു വര്‍ഷത്തിനുള്ളില്‍ ആഭ്യന്തര ഉല്‍പ്പാദനത്തില്‍ ഇരട്ടി വര്‍ധനവുണ്ടായി.
കേരളത്തിന്റെ ധനകാര്യ മാനേജ്‌മെന്റ് മികച്ചതാണ്. തടസ്സങ്ങളില്ലാത്ത രീതിയില്‍ സംസ്ഥാനത്തിന് മുന്നോട്ട് പോകാന്‍ കഴിയുന്നതിന്റെ കാരണമിതാണ്. എന്നാല്‍ വികസന ക്ഷേമ പ്രവര്‍ത്തനങ്ങള്‍ക്ക് സംസ്ഥാനത്തിന്റെ വരുമാനത്തോടൊപ്പം കേന്ദ്ര ഗവണ്‍മെന്റില്‍ നിന്നുള്ള നികുതി വിഹിതവും അര്‍ഹമായ ഗ്രാന്റുകളും ലഭിക്കണ്ടതാണ്. സംസ്ഥാന വിഹിതം മാനദണ്ഡങ്ങള്‍ക്കനുസൃതമായും സുതാര്യമായ നടപടി ക്രമങ്ങളിലൂടെയും കേന്ദ്ര ഗവണ്‍മെന്റ് അനുവദിക്കണം. റവന്യു കമ്മി ഗ്രാന്റിലും കേന്ദ്രസംസ്ഥാന ഗവണ്‍മെന്റുകള്‍ സംയുക്തമായി നടത്തേണ്ട പദ്ധതികള്‍ക്കുമടക്കം തുക അനുവദിക്കുന്നതില്‍ അനുകൂലമായ സമീപനമല്ലകേന്ദ്ര സര്‍ക്കാരിനുള്ളത്.
83,000 കോടി രൂപയുടെ പദ്ധതികള്‍ പ്രാവര്‍ത്തികമാക്കുകയാണ് കിഫ്ബിയിലൂടെ ചെയ്യുന്നത്. എന്നാല്‍ ഇത് പൊതുകടത്തില്‍ ഉള്‍പ്പെടുത്തിയത് സംസ്ഥാനത്തിന്റെ കടമെടുപ്പ് പരിധി കുറക്കുന്ന സാഹചര്യമുണ്ടായി. കടമെടുക്കാനുള്ള സംസ്ഥാനത്തിന്റെ ഭരണഘടനാപരമായ അധികാരം വെട്ടിക്കുറക്കുന്നത് വിവിധ വികസന പദ്ധതികളെ പ്രതികൂലമായി ബാധിക്കും.
സാമൂഹിക സുരക്ഷ പെന്‍ഷന് കണ്‍സോര്‍ഷ്യത്തില്‍ നിന്നും അനുവദിക്കുന്ന തുകയും കടത്തിലുള്‍പ്പെടുത്തി. ഈ നടപടികള്‍ കേരള സമൂഹത്തെ ബോധ്യപ്പെടുത്തുക കൂടിയാണ് നവകേരള സദസ്സിലൂടെ ചെയ്യുന്നത്.
1,07,500 കോടിയില്‍ പരം രൂപയുടെ കുറവാണ് സംസ്ഥാനം നേരിടുന്നത്. എന്നാല്‍ ഈ പ്രതിസന്ധികളിലും ജനക്ഷേമ വികസന പ്രവര്‍ത്തനങ്ങളുമായി സംസ്ഥാന സര്‍ക്കാര്‍ മുന്നോട്ട് പോവുകയാണ്. രാജ്യത്ത് ഏറ്റവും കുറവ് ദരിദ്രരുള്ള സംസ്ഥാനം ഇന്ന് കേരളമാണ്. ആഗോള വിശപ്പ് സൂചികയില്‍ 2013 ല്‍ നമ്മുടെ രാജ്യത്തിന്റെ സ്ഥാനം 55 ആയിരുന്നെങ്കില്‍ ഇന്നത് 111 ആണ്.
ഫെഡറല്‍ തത്വങ്ങളുടെ ലംഘനത്തിന്റെ പശ്ചാത്തലത്തിലാണ് സംസ്ഥാനം സുപ്രീം കോടതിയെ സമീപിച്ചിരിക്കുന്നത്. എല്ലാ വിഭാഗങ്ങളെയും ഉള്‍ക്കൊള്ളുന്ന ജനക്ഷേമകരമായ പ്രവര്‍ത്തനങ്ങളുമായി സംസ്ഥാന സര്‍ക്കാര്‍ മുന്നോട്ട് പോകുമെന്നും കേരളത്തിന്റെ മുഴുവന്‍ ജനസമൂഹവും അതിനായി അണിനിരക്കുമെന്ന സന്ദേശമാണ് നവകേരള സദസ്സ് നല്‍കുന്നതെന്നും മുഖ്യമന്ത്രി പറഞ്ഞു.
കലാപമുണ്ടാക്കുന്ന നീക്കങ്ങളുടെ പശ്ചാത്തലത്തില്‍ ആരും പ്രകോപിതരാകരുതെന്നാണ് ഗവണ്‍മെന്റ് അഭ്യര്‍ത്ഥിച്ചത്. എന്നാല്‍ മറിച്ചുള്ള നിലപാട് പ്രതിപക്ഷ നീക്കം ദൗര്‍ഭാഗ്യകരമാണ്. ഓരോ മണ്ഡലങ്ങളിലെയും നവകേരള സദസ്സിലേക്ക് ഒഴുകിയെത്തിയ പതിനായിരക്കണക്കിനാളുകള്‍ പരിപാടിയെ വന്‍ വിജയമാക്കി മാറ്റി. ജനങ്ങള്‍ നല്‍കിയ അംഗീകാരത്തോടെ നവകേരള സൃഷ്ടിക്കായുള്ള തുടര്‍ പ്രവര്‍ത്തനങ്ങള്‍ സര്‍ക്കാര്‍ സ്വീകരിക്കുമെന്നും മുഖ്യമന്ത്രി പറഞ്ഞു.
മന്ത്രിമാരായ അഹമ്മദ് ദേവര്‍ കോവില്‍, ജെ ചിഞ്ചുറാണി, സജി ചെറിയാന്‍ എന്നിവരും സംസാരിച്ചു. ജില്ലാ പഞ്ചായത്ത് പ്രസിഡന്റ് ഡി. സുരേഷ്‌കുമാര്‍ അധ്യക്ഷത വഹിച്ച ചടങ്ങില്‍ ഫിഷറീസ് വകുപ്പ് ഡപ്യൂട്ടി ഡയറക്ടര്‍ ഷീജ മേരി സ്വാഗതമാശംസിച്ചു.
