അമ്രോഹ: യുപിയില്‍ മോഷണക്കുറ്റം ആരോപിച്ച്‌ പോലീസ് കസ്റ്റഡിയിലെടുത്ത ദളിത് യുവാവ് ലോക്കപ്പില്‍ ദുരൂഹ സാഹചര്യത്തില്‍ മരിച്ചു. 11 പോലീസുകാരെ അന്വേഷണവിധേയമായി സസ്പെന്‍ഡ് ചെയ്തു. ഷേര്‍പുര്‍ നിവാസി ബാല്‍കിഷനെ(30) വാഹനമോഷണവുമായി ബന്ധപ്പെട്ട് പോലീസ് ചോദ്യം ചെയ്യാന്‍ കസ്റ്റഡിയിലെടുത്തത് ഞായറാഴ്ചയാണ്. ആരോഗ്യനില വഷളായതിനെത്തുടര്‍ന്ന് ലോക്കപ്പില്‍നിന്നു ചൊവ്വാഴ്ച ആശുപത്രിയിലേക്കു മാറ്റി. ബാല്‍ കിഷന്‍ മരിച്ചുവെന്നു ബന്ധുക്കളെ പോലീസ് അറിയിച്ചത് ബുധനാഴ്ച രാവിലെയാണ്.
പ്രതിഷേധം കനത്തതോടെ ഗ്രാമവാസികള്‍ ഇന്നലെ ബദാവുന്‍-പാനിപട്ട് സംസ്ഥാനപാത ഉപരോധിച്ചു. തന്‍റെ ഭര്‍ത്താവിനെ മര്‍ദിച്ചു കൊലപ്പെടുത്തിയതാണെന്നും കുറ്റമെന്താണെന്നു പറയാതെ നാലുദിവസം തുടര്‍ച്ചയായി ചോദ്യം ചെയ്തുവെന്നും ബാല്‍കിഷന്‍റെ ഭാര്യ കുന്തി പറഞ്ഞു. ധനൗര പോലീസ് സ്റ്റേഷന്‍ ഇന്‍ ചാര്‍ജ് അരവിന്ദ് ശര്‍മ ഉള്‍പ്പെടെ 11 പേര്‍ക്കെതിരേയാണു സര്‍ക്കാര്‍ നടപടിയെടുത്തിരിക്കുന്നത്.
