മലപ്പുറം : മലപ്പുറം ജില്ലയിലെ വള്ളിക്കുന്ന് സി.ബി.എച്ച്‌.എസ് സ്‌കൂളിലെ വിദ്യാര്‍ഥിനിയാണ് ദേവിക. വള്ളിക്കുന്ന് ഒലിപ്രംകടവിന് സമീപം താമസിക്കുന്ന ചോയിമഠത്തില്‍ പാതിരാട്ട് സജീവിൻറെയും സുജിതയുടേയും മകളായ ദേവിക ജനിച്ചതുതന്നെ ഇരുകൈകളുമില്ലാതെയാണ്. കാലുകളുപയോഗിച്ച്‌ ഗ്രേസ്മാര്‍ക്കുപോലും ഇല്ലാതെ മുഴുവന്‍ വിഷയങ്ങള്‍ക്കും എ പ്ലസ് നേടിയ ദേവികയെ – ഡിവൈഎഫ്‌ഐ അഖിലേന്ത്യാ പ്രസിഡന്റ് പി എ മുഹമ്മദ് റിയാസ് ദേവികയ്ക്ക് പുരസ്‌കാരം നല്‍കി ആദരിച്ചു.
ഗാനാലാപനമത്സരങ്ങളില്‍ ജില്ലാതലം വരെ മത്സരിക്കുകയും ചെയ്തിട്ടുണ്ട്. ജൂനിയര്‍ റെഡ് ക്രോസില്‍ അംഗമായ ദേവികയ്ക്ക് ഈ വര്‍ഷം മികച്ച കേഡറ്റിനുള്ള പുരസ്‌കാരവും ലഭിച്ചു. അച്ഛനുമമ്മയും കുഞ്ഞിനെ കാലുകള്‍കൊണ്ട് എഴുതാന്‍ പഠിപ്പിച്ചു. പഠിച്ച സ്‌കൂളുകളിലെല്ലാം അധ്യാപകരും കൂടെനിന്നു.കാലുകൊണ്ട് മനോഹരമായ ചിത്രംവരയ്ക്കാനും ദേവികയ്ക്ക് കഴിയും. സ്വപ്നചിത്ര കോഴിക്കോട് ആര്‍ട്ട് ഗ്യാലറിയില്‍ ഭിന്നശേഷിക്കാര്‍ക്കായി സംഘടിപ്പിച്ച പ്രദര്‍ശനത്തില്‍ ദേവിക വരച്ച ചിത്രങ്ങളും പ്രദര്‍ശിപ്പിച്ചിരുന്നു.
