റഷ്യയിൽ നിന്നും റൊണാൾഡോക്കും മടക്ക ടിക്കറ്റ്. എഡിസൻ കവാനി നേടിയ രണ്ടു ഗോളുകൾക്കാണ് ഉറുഗ്വേ പോർച്ചുഗലിനെ പരാജയപ്പെടുത്തിയത്. ഒന്നിനെതിരെ രണ്ടു ഗോളുകൾക്കാണ് ഉറുഗ്വേ വിജയിച്ചത്. പെപെ ആണ് പോർച്ചുഗലിന്റെ ആശ്വാസ ഗോൾ നേടിയത്. ഉറുഗ്വേയുടെ മുന്നേറ്റത്തോടെയാണ് ആദ്യ പകുതി തുടങ്ങിയത്. 7ആം മിനിറ്റിൽ തന്നെ കവാനിയിലൂടെ ഉറുഗ്വേ മുന്നിലെത്തി. സുവാരസ് നൽകിയ ക്രോസ് ബോക്സിലേക്ക് ഓടിയെത്തിയ കവാനി ഹെഡ് ചെയ്ത് പന്ത് വലയിൽ എത്തിച്ചു. ലോകകപിലെ തന്നെ മനോഹരമായ ഒരു ഗോളാണ് പിറന്നത്. എന്നാൽ ക്രിസ്റ്റ്യാനോ റൊണാൾഡോയുടെ നേതൃത്വത്തിൽ ഗോൾ തിരിച്ചടിക്കാൻ ശ്രമിച്ച പോർച്ചുഗലിന് ഉറുഗ്വേ പ്രതിരോധത്തെ മറികടന്ന് ഗോൾ നേടാനായില്ല. ആദ്യ പകുതിയിൽ 1-0 എന്നായിരുന്നു സ്കോർ നില.
എന്നാൽ 55ആം മിനിറ്റിൽ ഒരു കോർണറിലൂടെ പെപെ നേടിയ ഗോളിൽ പോർച്ചുഗൽ സമനില പിടിച്ചു. പക്ഷെ 61ആം മിനിറ്റിൽ കവാനി തന്നെ വീണ്ടും ഉറുഗ്വേക്ക് വേണ്ടി സ്കോർ ചെയ്ത് ഗോൾ നില 2-1 ആക്കി. പരിക്ക് മൂലം കവാനി മത്സരത്തിൽ നിന്നും പിന്മാറിയതോടെ ഉറുഗ്വേ പ്രതിരോധത്തിലേക്ക് നീങ്ങി. റിക്കാർഡോ കരസ്മയേയും രംഗത്തിറക്കി പോർച്ചുഗൽ ഗോൾ തിരിച്ചടിക്കാൻ നോക്കിയെങ്കിലും ഗോഡിന് നയിക്കുന്ന ഉറുഗ്വേ പ്രതിരോധം പൊളിക്കാനായില്ല. പരാജയത്തോടെ ഒരു ലോകകപ്പ് എന്ന സ്വപ്നം മെസ്സിയുടെ എന്നപോലെ റൊണാൾഡോയുടെയും റഷ്യയിൽ പൊലിഞ്ഞു.