കൊച്ചി: മത്സ്യത്തൊഴിലാളികളുടെ മക്കൾ പൊതുധാരയിലേക്ക് ഉയർന്ന് വരണമെന്ന് ഫിഷറീസ് വകുപ്പ് മന്ത്രി ജെ. മേഴ്സിക്കുട്ടിയമ്മ ഞാറക്കൽ ഗവ. വൊക്കേഷണൽ ഹയർ സെക്കന്ററി സ്കൂളിന്റെ പുതിയ അക്കാഡമിക് ബ്ലോക്ക് ഉദ്ഘാടനം ചെയ്ത് കൊണ്ട് പറഞ്ഞു. കടലിന്റെ അടിത്തട്ടിലെ അക്ഷയഖനി കണ്ടെത്തുന്നതിന് ഗവേഷണ രംഗത്തേക്കും കടന്ന് വന്ന് ഫിഷറീസ് യൂണിവേഴ്സിറ്റി മികവിന്റെ കേന്ദ്രമാക്കി മാറ്റണം.
മത്സ്യത്തൊഴിലാളികളുടെ മക്കൾ ഫിഷറീസ് കോഴ്സുകൾ പരമാവധി പ്രയോജനപ്പെടുത്തണം. ഡിജിറ്റൽ ലൈബ്രറി ആരംഭിക്കുന്നതിന്റെ സാധ്യതകൾ പരിശോധിക്കുമെന്ന് മന്ത്രി പറഞ്ഞു. പരമ്പരാഗത മത്സ്യത്തൊഴിലാളികൾക്ക് എല്ലാ സംരക്ഷണവും സർക്കാർ ഉറപ്പാക്കും . 20 മീറ്റർ വരെ നീളമുള്ള വളളങ്ങളുടെ ലൈസൻസ് വർദ്ധിപ്പിച്ചിട്ടില്ലെന്നും മന്ത്രി പറഞ്ഞു.
നബാർഡിന്റെ ഗ്രാമീണ അടിസ്ഥാന സൗകര്യ വികസന പദ്ധതിയിൽ ഉൾപ്പെടുത്തി 420 ലക്ഷം രൂപയുടെ ഭരണാനുമതി ലഭിച്ച പ്രവൃത്തിയിൽ 280 ലക്ഷം മുതൽ മുടക്കിൽ 926.30 ചതുരശ്ര മീറ്റർ വിസ്തീർണത്തിലാണ് അക്കാഡമിക് ബ്ലോക്ക് നിർമ്മിച്ചിരിക്കുന്നത്. മൂന്ന് നിലകളുള്ള കെട്ടിടത്തിൽ പ്രിൻസിപ്പൽ റൂം, ഓഫീസ് റൂം, 5 ക്ലാസ് മുറികൾ, ടോയ്ലറ്റ് ബ്ലോക്കുകൾ, 3 ലാബുകൾ എന്നിവയാണ് പ്രവർത്തിക്കുന്നത്. കൂടാതെ വിഎച്ച്എസ്ഇ വിഭാഗത്തിന് ആവശ്യമായ ഫർണിച്ചറുകളും ലാബ് ഉപകരണങ്ങളും വാങ്ങുന്നതിന് പത്ത് ലക്ഷം രൂപയും വകയിരുത്തിയിട്ടുണ്ട്. ഇതിനു പുറമേ മത്സ്യത്തൊഴിലാളി അടിസ്ഥാനസൗകര്യ വികസന പദ്ധതിയിൽ ഉൾപ്പെടുത്തി ഒരു ക്ലാസ് റൂമും സ്കൂളിന് അനുവദിച്ചിട്ടുണ്ട്.
ചടങ്ങിൽ വഴിയിൽ കളഞ്ഞുകിട്ടിയ 25000 രൂപയും രേഖകളും അടങ്ങുന്ന ബാഗ് പോലീസിന് കൈമാറിയ ഞാറക്കൽ ഗവ. വൊക്കേഷനൽ ഹയർ സെക്കൻഡറി സ്കൂളിലെ പ്ലസ് വൺ വിദ്യാർത്ഥി ദേവാനന്ദൻ വി ഡിയെ ഫിഷറീസ് വകുപ്പ് മന്ത്രി ജെ. മേഴ്സിക്കുട്ടിയമ്മ അനുമോദിച്ചു.
വൈപ്പിൻ എംഎൽഎ എസ് ശർമ അധ്യക്ഷത വഹിച്ച ചടങ്ങിൽ വൈപ്പിൻ ബ്ലോക്ക് പഞ്ചായത്ത് പ്രസിഡന്റ് ഡോ. കെ കെ ജോഷി, കേരള സ്റ്റേറ്റ് കോസ്റ്റൽ ഏരിയ ഡെവലപ്മെൻറ് കോർപ്പറേഷൻ മാനേജിങ് ഡയറക്ടർ പി.ഐ. ഷെയ്ക് പരീത്, ചീഫ് എൻജിനീയർ ബി ടി വി കൃഷ്ണൻ, ഞാറക്കൽ പഞ്ചായത്ത് പ്രസിഡന്റ് ഷിൽഡ റിബേര, ജില്ലാ പഞ്ചായത്ത് മെമ്പർ റോസ്മേരി ലോറൻസ്, പഞ്ചായത്ത് മെമ്പറും സ്കൂൾ പിടിഎ പ്രസിഡന്റുമായ പി.പി. ഗാന്ധി, പഞ്ചായത്ത് മെമ്പർമാർ , ജനപ്രതിനിധികൾ, ഹയർസെക്കൻഡറി വിഭാഗം പ്രിൻസിപ്പൽ ഉഷ എസ്, വൊക്കേഷനൽ ഹയർസെക്കൻഡറി വിഭാഗം പ്രിൻസിപ്പൽ ജയശ്രീ പി എസ് തുടങ്ങിയവർ സംസാരിച്ചു .
