ന്യൂഡല്‍ഹി • വാശിയേറിയ മല്‍സരത്തിനൊടുവില്‍ ഡല്‍ഹി ഡയനാമോസ്- നോര്‍ത്ത് ഈസ്റ്റ് യുണൈറ്റഡ് പോരാട്ടം സമനിലയില്‍ അവസാനിച്ചു. ഇരു ടീമുകളും ഒാരോ ഗോള്‍ വീതം നേടി. 38, 51 മിനിറ്റുകളിലായിരുന്നു ഗോളുകള്‍. സ്വന്തം കാണികള്‍ക്കു മുന്നിലിറങ്ങിയ ഡല്‍ഹിയാണ് ആദ്യം സ്കോര്‍ ചെയ്തത്.38-ാം മിനിറ്റില്‍ കീന്‍ ലൂയിസ് ആണ് ഡല്‍ഹിക്കുവേണ്ടി നോര്‍ത്ത് ഈസ്റ്റ് വല കുലുക്കിയത്. തുടര്‍ന്ന് ഉണര്‍ന്നുകളിച്ച നോര്‍ത്ത് ഈസ്റ്റ് രണ്ടാം പകുതിയില്‍ സമനില ഗോള്‍ നേടി. 51-ാം മിനിറ്റില്‍ അല്‍ഫാരോ ആണ് ഗോള്‍ നേടിയത്. തുടര്‍ന്നും ഇരു ടീമുകളും മികച്ച പ്രകടനം നടത്തിയെങ്കിലും ഗോള്‍ പിറന്നില്ല. സമനിലയാണെങ്കിലും അഞ്ചു മല്‍സരങ്ങളില്‍ നിന്നു 10 പോയിന്റുമായി നോര്‍ത്ത് ഈസ്റ്റാണ് പോയിന്റ് പട്ടികയില്‍ ഒന്നാമത്. മൂന്നു മല്‍സരങ്ങളില്‍ രണ്ടു സമനിലയും ഒരു ജയവുമായി ഡല്‍ഹി മൂന്നാം സ്ഥാനത്തുണ്ട്.
