ദുബായ് : ഇന്ത്യൻ ക്യാപ്റ്റൻ വിരാട് കോഹ്‌ലി ഐസിസി റാങ്കിംഗിൽ ഒന്നാം സ്ഥാനത്ത് തിരിച്ചെത്തി. ചാമ്പ്യൻസ് ട്രോഫിയിലെ മികച്ച പ്രകടനമാണ് കോഹ്‌ലിക്ക് നേട്ടമായത്. ഒന്നാം സ്ഥാനത്തുണ്ടായിരുന്ന ദക്ഷിണാഫ്രിക്കയുടെ എ.ബി ഡിവില്ലിയേഴ്സിനെയാണ് കോഹ്‌ലി മറികടന്നത്. ഫെബ്രുവരി 25 മുതൽ ഒന്നാം സ്ഥാനത്തുണ്ടായിരുന്ന എ.ബിയെ 22 പോയിന്‍റുകൾക്കാണ് കോഹ്‌ലി പിന്നോട്ടടിച്ചത്. 2017 ജനുവരിയിലാണ് ഇതിമുമ്പ് കോഹ്‌ലി ഒന്നാം സ്ഥാനത്ത് എത്തിയത്. എന്നാൽ നാലു ദിവസം മാത്രമായിരുന്നു അന്നത്തെ ഒന്നാം സ്ഥാനത്തിന്‍റെ ആയുസ്. ഇന്ത്യൻ ഓപ്പണർ ശിഖർ ധവാനും ഏറെനാളുകൾക്കു ശേഷം ആദ്യ 10 ൽ തിരിച്ചെത്തി. രോഹിത് ശർമ, ധോണി, യുവരാജ് എന്നിവർ യഥാക്രമം 13, 14, 88 സ്ഥാനങ്ങളിലാണ്. ഇന്ത്യൻ പേസർമാരിൽ ഭുവനേശ്വർ കുമാറാണ് മുന്നിൽ. ഭുവി 23 ാം സ്ഥാനത്താണ്. ഉമേഷ് യാദവ് 41, ജസ്പ്രീത് ബുമ്ര 43–ാം റാങ്കും നേടി. സ്പിന്നർമാരായ അശ്വിൻ രണ്ടുസ്ഥാനം നഷ്ടപ്പെട്ട് 20–ാമതും രവീന്ദ്ര ജഡേജ മൂന്നുസ്ഥാനം നഷ്ടപ്പെട്ട് 29–ാം റാങ്കിലുമെത്തി. ടീം റാങ്കിംഗിൽ ദക്ഷിണാഫ്രിക്ക ഒന്നാം സ്ഥാനം നിലനിർത്തി.
