ഇസ്ലാമബാദ് : പാക്കിസ്ഥാന്‍ പുതുയുഗപ്പിറവിയിലേക്കാണ് കടക്കുന്നതെന്ന്
മുന്‍ ക്രിക്കറ്റ് താരവും തെഹ്‌റീക്-ഇ-ഇന്‍സാഫ് പാര്‍ട്ടി നേതാവുമായ ഇമ്രാന്‍ ഖാന്‍. ഇപ്പോള്‍ നേടിയിരിക്കുന്ന വിജയം 22 വര്‍ഷത്തെ പോരാട്ടത്തിന്റെ വിജയമാണെന്നും തന്നെ വ്യക്തിപരമായി ആക്രമിച്ചവരോടൊക്കെ ക്ഷമിക്കുകയാണെന്നും തന്റെ സര്‍ക്കാര്‍ ആരോടും പ്രതികാരം ചെയ്യില്ലെന്നും
ഇമ്രാന്‍ ഖാന്‍ വ്യക്തമാക്കി. തെരഞ്ഞെടുപ്പില്‍ തന്നെ സഹായിച്ച സൈന്യത്തിനും ഇമ്രാന്‍ ഖാന്‍ നന്ദി പറഞ്ഞു.
രാജ്യത്ത് അഴിമതി വര്‍ധിച്ചിരിക്കുകയാണ്. എന്നാല്‍ ജനാധിപത്യം ശക്തിപ്പെട്ടു. വിദ്യാഭ്യാസം, ആരോഗ്യം, കാര്‍ഷികം, തൊഴിലാളി സംരക്ഷണം, കുടിവെള്ളം എന്നിവയ്ക്ക് തന്റെ സര്‍ക്കാര്‍ പ്രാധാന്യം നല്‍കും. പാവപ്പെട്ടവര്‍ക്ക് വേണ്ടിയുള്ള സര്‍ക്കാരാകും വരാന്‍ പോകുന്നത് അദ്ദേഹം അറിയിച്ചു. ഇന്ത്യയിലെ മാധ്യമങ്ങള്‍ തന്നെ ബോളിവുഡ് സിനിമയിലെ വില്ലന്‍മാരെപ്പോലെയാണ് ചിത്രീകരിച്ചത്. എന്നാല്‍ ഇന്ത്യയുമായി നല്ല ബന്ധം പുലര്‍ത്തണമെന്നാണ് ആഗ്രഹിക്കുന്നത്. ഇന്ത്യയുമായി വ്യാപാര ബന്ധം തുടരുമെന്നും ഇമ്രാന്‍ ഖാന്‍ കൂട്ടിച്ചേര്‍ത്തു.
