കൊച്ചി/കോയമ്ബത്തൂര്‍: ഐ.എസ്. ബന്ധത്തിന്റെ പേരില്‍ അറസ്റ്റിലായവര്‍ നല്‍കിയ വിവരങ്ങളുടെ അടിസ്ഥാനത്തില്‍ കൂടുതല്‍ മലയാളികള്‍ എന്‍.ഐ.എ.യുടെ നിരീക്ഷണത്തില്‍. അറസ്റ്റിലായവരുമായി ആശയവിനിമയം നടത്തിയിരുന്ന നൂറോളം പേരുടെ സമൂഹമാധ്യമങ്ങളിലെ അക്കൗണ്ടുകള്‍ നിരീക്ഷിച്ചുവരികയാണ്. ഐ.എസ്. ബന്ധം സംശയിച്ച്‌ കോയമ്ബത്തൂരില്‍ ഇതുവരെ 16 പേരെ എന്‍.ഐ.എ. ചോദ്യംചെയ്തു. കൂടുതല്‍പേര്‍ക്ക് ഐ.എസ്. ബന്ധമുണ്ടെന്ന സംശയത്തെത്തുടര്‍ന്ന് എന്‍.ഐ.എ.യുടെ ഒരു സംഘം അഫ്ഗാനിസ്താനിലേക്ക് പോയതായും സൂചനകളുണ്ട്.അറസ്റ്റിലായവരില്‍ ചിലര്‍ അഫ്ഗാനിസ്താനില്‍ പരിശീലനം നേടിയതായി സ്ഥിരീകരിച്ചതിനെത്തുടര്‍ന്നാണ് അന്വേഷണം അങ്ങോട്ടേക്ക് വ്യാപിപ്പിച്ചത്.മലയാളികള്‍ക്കൊപ്പം ഏതാനും തമിഴ്നാട് സ്വദേശികളും എന്‍.ഐ.എ.യുടെ നിരീക്ഷണത്തിലുണ്ട്. കേരളത്തിലും തമിഴ്നാട്ടിലും സംഘടനയുടെ ആശയങ്ങള്‍ പ്രചരിപ്പിക്കുകയായിരുന്നു ഇവരുടെ ലക്ഷ്യം. ഇപ്പോള്‍ കസ്റ്റഡിയിലുള്ള പ്രധാന പ്രതികളാണ് കൂടുതല്‍ തീവ്ര ആശയങ്ങള്‍ പ്രചരിപ്പിച്ചിരുന്നത്. ഐ.എസ്. ആശയങ്ങളോട് ആഭിമുഖ്യമുള്ള ചിലരുടെ ലേഖനങ്ങള്‍ ഇവര്‍ പ്രചരിപ്പിച്ചിരുന്നു. കണ്ണൂരിലെ കനകമലയില്‍ രഹസ്യയോഗം നടത്തുന്നതടക്കമുള്ള കാര്യങ്ങള്‍ ഈ അക്കൗണ്ടുകളിലൂടെ അവര്‍ പങ്കുവെച്ചിരുന്നു. നാല് ഫെയ്സ്ബുക്ക് ഗ്രൂപ്പുകളാണ് ഇപ്പോള്‍ എന്‍.ഐ.എ അതിസൂക്ഷ്മതയോടെ നിരീക്ഷിക്കുന്നത്. ഇതില്‍ മൂന്നെണ്ണം മലയാളികള്‍ മാത്രമുള്ള ഗ്രൂപ്പുകളാണ്. ഐ.എസ്സിന്റെ മലയാളം വെബ്സൈറ്റിന് പിന്നിലും ഇവര്‍ തന്നെയാണെന്നാണ് കരുതുന്നത്.
മലയാളികള്‍ക്കൊപ്പം മറ്റു നാട്ടുകാരും ഉള്ള ഗ്രൂപ്പിലും ആശയവിനിമയങ്ങള്‍ സജീവമായിരുന്നു. കോയമ്ബത്തൂരില്‍ ഒക്ടോബര്‍ ഒന്നിന് ആറുപേരെ വിളിച്ചു വരുത്തി ചോദ്യംചെയ്തിരുന്നു. ഇവരുടെ വീടുകളില്‍ പരിശോധന നടത്തി. ഇവരില്‍നിന്ന് ശേഖരിച്ച വിവരങ്ങളുടെ അടിസ്ഥാനത്തില്‍ 10 പേരെക്കൂടി ചോദ്യംചെയ്തു. കോയമ്ബത്തൂര്‍ സിറ്റി പോലീസ് ഓഫീസില്‍ കനത്ത സുരക്ഷയിലായിരുന്നു ചോദ്യം ചെയ്യല്‍. ചിലര്‍ പാസ്പോര്‍ട്ട് സാമ്ബാദിച്ചതായി കണ്ടെത്തി. ഇവരുടെ പേരു വിവരങ്ങള്‍ തത്കാലം വെളിപ്പെടുത്താനാവില്ലെന്ന് പോലീസ് പറഞ്ഞു. ആവശ്യപ്പെടുമ്ബോള്‍ ഹാജരാകണമെന്ന വ്യവസ്ഥയില്‍ എല്ലാവരെയും വിട്ടയച്ചു.
