തൃശൂര്‍: പാമ്പാടി നെഹ്റു കോളജ് വിദ്യാര്‍ഥി ജിഷ്ണു പ്രണോയി ജീവനൊടുക്കിയതെന്നു സിബിഐ. രണ്ടു പേര്‍ക്കെതിരേ ആത്മഹത്യ പ്രേരണാകുറ്റം ചുമത്തി സിബിഐ കുറ്റപത്രം സമര്‍പ്പിച്ചു. വൈസ് പ്രിന്‍സിപ്പല്‍ ശക്തിവേല്‍, സി.പി. പ്രവീണ്‍ എന്നിര്‍ക്കെതിരേയാണ് ആത്മഹത്യ പ്രേരണാകുറ്റം. നെഹ്റു ഗ്രൂപ്പ് ചെയര്‍മാന്‍ പി.കൃഷ്ണദാസിനെ കേസില്‍നിന്ന് ഒഴിവാക്കി.
2017 ജനുവരി ആറിനാണു കോളജിലെ ബിടെക് കമ്പ്യൂട്ടർ സയന്‍സ് വിദ്യാര്‍ഥിയായിരുന്ന ജിഷ്ണു പ്രണോയ് മരിച്ചത്. പഴയന്നൂര്‍ പോലീസ് അസ്വാഭാവിക മരണത്തിനു രജിസ്റ്റര്‍ ചെയ്ത എഫ്‌ഐആര്‍, സിബിഐയുടെ തിരുവനന്തപുരം യൂണിറ്റ് എസ്പി കെ.എം. വര്‍ക്കി എറണാകുളം ചീഫ് ജുഡീഷല്‍ മജിസ്ട്രേറ്റ് കോടതിയില്‍ റീ രജിസ്റ്റര്‍ ചെയ്താണ് അന്വേഷണം ആരംഭിച്ചത്.
ജിഷ്ണു പ്രണോയിയെ കോപ്പിയടിക്കേസില്‍ കരുതിക്കൂട്ടി കുടുക്കിയതാണെണെന്നാണു പോലീസിന്‍റെ അന്വേഷണത്തില്‍ കണ്ടെത്തിയത്. മാനേജ്മെന്‍റിനെ വിമര്‍ശിച്ചതിന്‍റെ പേരിലായിരുന്നു പ്രതികാരനടപടി. കോപ്പിയടി കേസില്‍ ജിഷ്ണുവിനെ മനപൂര്‍വം പ്രതിചേര്‍ക്കുകയായിരുന്നെന്നും കോളജ് പ്രിന്‍സിപ്പല്‍ ഇത് എതിര്‍ത്തിരുന്നെന്നും പോലീസ് റിപ്പോര്‍ട്ട് പറയുന്നു.
കോപ്പിയടിക്കേസില്‍ ജിഷ്ണുവിനെ കുടുക്കിയതിന്‍റെ മുഖ്യ സൂത്രധാരന്‍ ചെയര്‍മാന്‍ പി.കൃഷ്ണദാസ് ആയിരുന്നു. ജിഷ്ണു പരീക്ഷയ്ക്കിരുന്ന രണ്ടു ഹാളിലും പ്രവീണ്‍ എന്ന അധ്യാപകനെയാണ് ചുമതലയേല്‍പ്പിച്ചത്. ജിഷ്ണുവിനെ കോപ്പിയടിയില്‍ കുടുക്കാന്‍ മാനേജ്മെന്‍റ് പ്രവീണിനെ ചുമതലപ്പെടുത്തുകയായിരുന്നു. ഇത് പ്രവീണ്‍ നടപ്പാക്കി.
ജിഷ്ണു കോപ്പിയടിച്ചെന്ന് ആരോപിച്ച്‌ പ്രിന്‍സിപ്പലിനെ സമീപിച്ചപ്പോള്‍ യൂണിവേഴ്സിറ്റിയില്‍ അറിയിക്കേണ്ടതായ കുറ്റമൊന്നും ഇതിലില്ലെന്നായിരുന്നു അദ്ദേഹം നിലപാട് എടുത്തത്. എന്നാല്‍ പ്രവീണ്‍ അടക്കമുള്ള മാനേജ്മെന്‍റിന്‍റെ അടുപ്പക്കാരായ ജീവനക്കാര്‍ ജിഷ്ണുവിനെ വൈസ് പ്രിന്‍സിപ്പലിന്‍റെ മുറിയിലേക്ക് കൊണ്ടുപോയി. ഇവിടെവച്ച്‌ സംഘം ജിഷ്ണുവിനെ മര്‍ദിച്ചതെന്നും കേരള പോലീസിന്‍റെ അന്വേഷണത്തില്‍ കണ്ടെത്തിയിരുന്നു.
