ശ്രീനഗര്‍: ജമ്മു കശ്മീരിൽ ഭീകരർ നടത്തിയ നുഴഞ്ഞുകയറ്റ ശ്രമം പരാജയപ്പെടുത്തിയ സൈന്യം രണ്ട് ഭീകരരെ വധിച്ചു. ഇന്ത്യന്‍ സൈനിക പോസ്റ്റുകള്‍ ആക്രമിക്കാനായി ഞായറാഴ്ച രാത്രി നടത്തിയ നുഴഞ്ഞുകയറ്റ ശ്രമമാണ് സൈന്യം അവസരോചിതമായ ഇടപെടലിലൂടെ തകര്‍ത്തത്. നൗഗാം സെക്ടറില്‍ പാക്കിസ്ഥാനി ബോര്‍ഡര്‍ ആക്ഷന്‍ ടീമിന്റെ യൂണിഫോം അണിഞ്ഞാണ് തീവ്രവാദികള്‍ നുഴഞ്ഞുകയറാന്‍ ശ്രമിച്ചത്.
നിയന്ത്രണ രേഖയോട് അടുത്ത വനമേഖലയിലൂടെയൊണ് ഇവരെത്തിയത്. മോര്‍ട്ടാര്‍, റോക്കറ്റുകള്‍ എന്നിവയടക്കം വന്‍ ആയുധശേഖരവും ഇവരുടെ കൈവശമുണ്ടായിരുന്നുവെന്ന് സൈനിക വക്താവ് അറിയിച്ചു. സംഘത്തിലെ മറ്റുള്ളവര്‍ക്കായി സൈന്യം തിരച്ചില്‍ തുടരുകയാണ്.
