ഛത്തീസ്ഗഡിലെ സുഖ്‍മയില്‍ നടന്ന നക്സൽ ആക്രമണത്തില്‍ 24 സിആർപിഎഫ് ജവാൻമാർ കൊല്ലപ്പെട്ടു. സിആര്‍പിഎഫിന്‍റെ 74 ആം ബറ്റാലിയനിലെ ജവാന്മാരാണ് കൊല്ലപ്പെട്ടത്. മാവോയിസ്റ്റ് കേന്ദ്രമായ ബുര്‍കാപാല്‍ ചിന്താഗുഫ പ്രദേശത്ത് ഉച്ചയ്ക്ക് 12.30 മുതലാണ് ഏറ്റുമുട്ടല്‍ തുടങ്ങിയത്. ഇന്‍സ്പെക്ടര്‍ റാങ്കില്‍ ഉള്‍പ്പെടെയുള്ളവരാണ് കൊല്ലപ്പെട്ടതെന്നും പോരാട്ടം ഇപ്പോഴും തുടരുകയാണെന്നും റിപ്പോര്‍ട്ടുകളുണ്ട്. പരിക്കേറ്റവരെ രക്ഷിക്കാന്‍ ഹെലികോപ്റ്റര്‍ ഉപയോഗിച്ച് ശ്രമങ്ങള്‍ നടക്കുന്നുണ്ട്. ഈ പ്രദേശത്ത് ഈ വര്‍ഷം ആദ്യം നടന്ന മറ്റൊരു മാവോയിസ്റ്റ് ആക്രമണത്തില്‍ 12 സിആര്‍പിഎഫ് ജവാന്മാര്‍ കൊല്ലപ്പെട്ടിരുന്നു.
