കുവൈത്ത്: കുവൈത്തില്‍ ദുരൂഹ സാഹചര്യത്തില്‍ മരിച്ച മലയാളി പെണ്‍കുട്ടിയുടെ മൃതദേഹം നാട്ടിലേക്ക് കൊണ്ടുപോകാനാവാതെ മോര്‍ച്ചറിയില്‍. പെണ്‍കുട്ടിയുടെ മരണവുമായി ബന്ധപ്പെട്ട് അന്വേഷണം നടക്കുന്നതിനാല്‍ മാതാപിതാക്കള്‍ക്ക് രാജ്യംവിടാന്‍ കഴിയാത്തതിനാലാണ് മൃതദേഹം മോര്‍ച്ചറിയില്‍ സൂക്ഷിക്കുന്നത്.
മൃതദേഹം നാട്ടിലേക്ക് കൊണ്ട്‌ പോകുന്നതിനു അധികൃതര്‍ അനുമതി നല്‍കുകയും ഇതിനായുള്ള നടപടി ക്രമങ്ങള്‍ നേരത്തെ പൂര്‍ത്തിയാക്കുകയും ചെയ്തിരുന്നു. എന്നാല്‍ മാതാപിതാക്കള്‍ക്ക് രാജ്യം വിടാന്‍ കഴിയില്ലെന്നു വന്നതോടെ മൃതദേഹം മോര്‍ച്ചറിയില്‍ തന്നെ സൂക്ഷിക്കുകയായിരുന്നു. പെണ്‍കുട്ടിയുടെ മൃതദേഹം കഴിഞ്ഞ ഒമ്ബത് ദിവസമായി ഫര്‍വാനിയ ദജീജില്‍ ഉള്ള മോര്‍ച്ചറിയിലാണ് സൂക്ഷിച്ചിരിക്കുന്നത്.
മരണത്തില്‍ അസ്വഭാവികത ഉണ്ടെന്ന നിഗമനത്തിലാണ് അന്വേഷണ സംഘം. കേസുമായി ബന്ധപ്പെട്ട് പെണ്‍കുട്ടിയുടെ ഏറ്റവും അടുത്ത ബന്ധുവിനേയും മലയാളികളായ രണ്ടു സ്ത്രീകളെയും പോലീസ് കസ്റ്റഡിയിലെടുത്തിട്ടുണ്ട്. ഇവരെ ചോദ്യം ചെയ്തുവരികയാണ്. കഴിഞ്ഞ മാസം 26നു രാത്രിയിലാണ് കഴുത്തില്‍ മുറിവേറ്റ പാടുമായി പെണ്‍കുട്ടിയെ അബാസിയ ക്ലിനിക്കില്‍ പ്രവേശിപ്പിച്ചത്‌. പിന്നീട്‌ കുട്ടിയെ ഫര്‍വാനിയ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല.
ഫ്ളാറ്റിലെ ശുചിമുറിയില്‍ കഴുത്തു മുറുകി തൂങ്ങിയ നിലയിലാണു മകളെ കണ്ടെത്തിയതെന്നാണ് പിതാവ് പോലീസിന് നല്‍കിയ മൊഴി. സംഭവത്തിനു അല്‍പ നേരം മുമ്ബ്‌ വരെ താന്‍ ഫ്ളാറ്റില്‍ ഉണ്ടായിരുന്നെന്നും സ്വകാര്യ സ്ഥാപനത്തില്‍ ജോലി ചെയ്യുന്ന കുട്ടിയുടെ അമ്മയെ ജോലി കഴിഞ്ഞു വീട്ടിലേക്ക്‌ കൊണ്ട്‌ വരുന്നതിനു പുറത്തു പോയ സമയത്തിനിടയിലാണു അത്യാഹിതം സംഭവിച്ചതെന്നും പിതാവ് നല്‍കിയ മൊഴിയില്‍ പറയുന്നു. കുട്ടിയുടെ ആന്തരിക അവയവങ്ങള്‍ ഫോറന്‍സിക്‌ പരിശോധനക്ക്‌ അയച്ചിട്ടുണ്ട്.
