കോട്ടയം: ഞായറാഴ്ച രാത്രി ഒന്‍പതു മണിയോടെയാണ് സംഭവം. വാഹന പരിശോധനയ്ക്കിടെ മോട്ടോര്‍വാഹനവകുപ്പ് ഉദ്യോഗസ്ഥരെ വെട്ടിച്ച്‌ പാഞ്ഞ കല്ലട ബസ് സിനിമാ സ്‌റ്റൈലില്‍ പിന്തുടര്‍ന്ന് പിടികൂടി പിഴയീടാക്കി. മോട്ടോര്‍വാഹന വകുപ്പിന്റെ എന്‍ഫോഴ്സ്മെന്റ് സംഘം എം.സി.റോഡില്‍ ഏറ്റുമാനൂര്‍ ക്ഷേത്രത്തിനു സമീപം വാഹനപരിശോധന നടത്തുകയായിരുന്നു.
കോട്ടയത്തുനിന്നെത്തിയ കല്ലട ബസ് പരിശോധിക്കാനായി ചുവന്ന സിഗ്‌നല്‍ ലൈറ്റ് കാണിച്ചെങ്കിലും നിര്‍ത്തിയില്ല. തൊട്ടുപുറകേ വന്ന മറ്റൊരു കല്ലട ബസ് മോട്ടോര്‍ വാഹനവകുപ്പ് ഉദ്യോഗസ്ഥര്‍ തടഞ്ഞു. ആ ബസിന്റെ ഡ്രൈവറോട് മുന്‍പില്‍പോയ ബസിന്റെ റൂട്ട് മനസ്സിലാക്കിയ ശേഷം പിന്തുടര്‍ന്നു പിടികൂടുകയായിരുന്നു.
ഏറ്റുമാനൂര്‍-എറണാകുളം റൂട്ടില്‍ ഏഴുകിലോമീറ്റര്‍ അകലെ കോതനല്ലൂരില്‍നിന്നാണ് ബസ് പിടികൂടിയത്. അമിതവേഗത്തില്‍ വാഹനം ഓടിച്ചതിന് 1000 രൂപയടക്കം 6000 രൂപ പിഴയീടാക്കി. തുടര്‍ന്ന വാഹനം വിട്ടുനല്‍കി.
അസിസ്റ്റന്റ് മോട്ടോര്‍ വെഹിക്കിള്‍ ഇന്‍സ്പെക്ടര്‍മാരായ രജീഷ് ഹരിദാസ്, എസ്.സുനില്‍കുമാര്‍, ഒ.അന്‍ഷാദ് എന്നിവര്‍ ചേര്‍ന്നാണ് ബസ് പിടികൂടിയത്.
