കൊച്ചി: നഗരസഭ മേയര് സൗമിനി ജെയിനിനെതിരെ ജില്ലാ കലക്ടറുടെ സാന്നിധ്യത്തില്‍ ഉച്ചക്ക് രണ്ടരയോടെ അവിശ്വാസപ്രമേയ നടപടികള്‍ ആരംഭിക്കും.പ്രതിപക്ഷം നല്‍കിയ അവിശ്വാസ പ്രമേയത്തില്‍ വോട്ടെടുപ്പ് ഇന്ന്.
സൗമിനി ജെയിനിന്റെ കഴിഞ്ഞ നാല് വര്‍ഷത്തെ ഭരണം പരാജയമാണെന്ന് ആരോപിച്ചാണ് ഇടതുപക്ഷം അവിശ്വാസ പ്രമേയം കൊണ്ടുവന്നത്. കോണ്‍ഗ്രസിനുള്ളില്‍ തന്നെ മേയര്‍ക്കെതിരായ വികാരമുണ്ടെന്നും ഇത് ഉപകരിക്കുമെന്നും ഏഴ് യു.ഡി.എഫ് അംഗങ്ങളും ഒരു ബി.ജെ.പി അംഗവും മേയര്‍ക്കെതിരെ നിലപാട് എടുക്കുമെന്നുമാണ് പ്രതിപക്ഷം കരുതുന്നത്.
മേയര് സ്ഥാനം വെച്ചു മാറുന്നതുമായി ബന്ധപ്പെട്ട് കരാറുണ്ടായിരുന്നുവെന്ന് വാദിക്കുന്ന ഒരു വിഭാഗം യു.ഡി.എഫ് അംഗങ്ങളുടെ പിന്തുണയും മേയര്‍ക്കെതിരെയുള്ള അവിശ്വാസ പ്രമേയത്തില്‍ ഉണ്ടാവുമെന്നും പ്രതിപക്ഷം പ്രതീക്ഷിക്കുന്നു. അതേസമയം, അവിശ്വാസ പ്രമേയ നടപടിക്രമങ്ങളില്‍ നിന്ന് വിട്ടുനിന്ന് വോട്ടെടുപ്പ് മാറ്റി വെപ്പിക്കാനാണ് യു.ഡി.എഫ് ശ്രമിക്കുന്നത്. 74 അംഗ കൗണ്‍സിലില്‍ രണ്ട് ബിജെപി അംഗങ്ങളും 34 എല്‍.ഡി.എഫ് അംഗങ്ങളും 38 യു.ഡി.എഫ് അംഗങ്ങളുമാണുള്ളത്.അവിശ്വാസ പ്രമേയത്തില്‍ ചര്‍ച്ചക്ക് ക്വാറം തികയണമെങ്കില്‍ പകുതിയില്‍ കൂടുതല്‍ അംഗങ്ങള്‍ ആവശ്യമാണ്. അതിനാല്‍ അംഗങ്ങളാരും തന്നെ കൗണ്‍സില്‍ യോഗത്തില്‍ പങ്കെടുക്കരുതെന്ന് യു.ഡി.എഫ് േനതൃത്വം നിര്‍ദേശം നല്‍കിയിട്ടുണ്ട്.
ചര്‍ച്ചക്കുള്ള അവസരം പ്രതിപക്ഷത്തിന് നല്‍കാതെ നടപടികള്‍ നീട്ടിക്കൊണ്ടുപോവുകയാണ് യു.ഡി.എഫിന്റെ ലക്ഷ്യം. ബി.ജെ.പി അംഗങ്ങളും നടപടി ക്രമങ്ങളില്‍ നിന്ന് വിട്ടു നിന്നേക്കുമെന്നാണ് വിവരം.
