മലപ്പുറം: തിരൂരങ്ങാടി നിയമസഭ മണ്ഡലത്തിലെ സ്ഥാനാര്‍ഥിയായി പ്രഖ്യാപിച്ച മുതിര്‍ന്ന മുസ്ലിംലീഗ് േനതാവ് കെ.പി.എ മജീദിനെ പിന്‍വലിക്കണമെന്നാവശ്യപ്പെട്ട് മുസ്ലിംലീഗ് പ്രവര്‍ത്തര്‍ പാണക്കാടെത്തി. തിരൂരങ്ങാടിക്കാരന്‍ തന്നെയായ പി.എം.എ സലാമിനെ സ്ഥാനാര്‍ഥിയാക്കണമെന്നാണ് ലീഗ് പ്രവര്‍ത്തകരുടെ ആവശ്യം. കെ.പി.എ മജീദിന് വേണമെങ്കില്‍ അദ്ദേഹത്തിന്‍റെ ജന്മനാടായ മങ്കടിയിലോ സമീപ പ്രദേശങ്ങളിലോ മത്സരിക്കാമെന്നും തിരൂരങ്ങാടിയില്‍ വേണ്ടെന്നുമാണ് ലീഗ് പ്രവര്‍ത്തകരുടെ വാദം.
2004ല്‍ ലീഗിന്‍റെ ഉരുക്കുകോട്ടയായ മഞ്ചേരി ലോക്സഭ മണ്ഡലത്തില്‍ പരാജയപ്പെട്ട ശേഷം കെ.പി.എ മജീദ് ഇതാദ്യമായാണ് മത്സരരംഗത്തേക്കിറങ്ങുന്നത്. സി.പി.ഐയുടെ അജിത് കൊളാടിയാണ് മണ്ഡലത്തില്‍ എല്‍.ഡി.എഫ് സ്ഥാനാര്‍ഥി.പ്രാദേശിക ഭാരവാഹികളടക്കമുള്ളവരാണ് പ്രതിഷേധവുമായി രംഗത്തെത്തിയത്. മജീദിനെ തോല്‍പ്പിക്കുമെന്നും ലീഗ് പ്രവര്‍ത്തകര്‍ മുന്നറിയിപ്പ് നല്‍കുന്നു.
