ജിദ്ദ: മൂന്നാം ഹറം വിപുലീകരണ പദ്ധതിയോടൊപ്പം നടപ്പാക്കുന്ന പ്രധാന പദ്ധതികളിലൊന്നാണ് മക്ക ഹറമിനും അനുബന്ധ കെട്ടിടങ്ങള്‍ക്കും ആവശ്യമായ വെള്ളം സംഭരിക്കുന്നതിനുള്ള പുതിയ ജലസംഭരണിയെന്ന് ഇരു ഹറം കാര്യാലയത്തിനു കീഴിലെ പ്രോജക്ട് ആന്‍ഡ് എന്‍ജിനീയറിങ് പഠനവിഭാഗം അണ്ടര്‍ സെക്രട്ടറി എന്‍ജി. സുല്‍ത്താന്‍ അല്‍ഖുറശി പറഞ്ഞു.
100 മീറ്റര്‍ വ്യാസമുള്ള സംഭരണിയില്‍ 1,40,000 ക്യുബിക് മീറ്റര്‍ ജലം സൂക്ഷിക്കാനാകും. തറയും ചുവരും ഇരുമ്ബും മേല്‍ക്കൂര അലുമിനിയവും കൊണ്ടും നിര്‍മിച്ചതാണ്. ഹറമിനു മാത്രമുള്ള സംഭരണിയാണിത്. 80,000 ക്യുബിക് മീറ്റര്‍ ജലം സംഭരിക്കാന്‍ കഴിയുന്ന പഴയ ജലസംഭരണിയുമായി ഇതിനെ ബന്ധിപ്പിക്കും. പൈപ്പ്ലൈനുകളുടെ ജോലി 93 ശതമാനം പൂര്‍ത്തിയായിട്ടുണ്ട്. മൂന്നാം റിങ് റോഡിലെ വാട്ടര്‍ സ്റ്റേഷനില്‍നിന്നാണ് വെള്ളമെത്തിക്കുന്നത്. അവിടുന്ന് കഅ്കിയയിലുള്ള പമ്ബിങ് സ്റ്റേഷനിലേക്ക് വെള്ളം പമ്ബ് ചെയ്യും.
അവിടെനിന്നാണ് മലക്കു മുകളില്‍ സ്ഥാപിച്ച പുതിയ മെറ്റല്‍ ടാങ്കിലേക്കും പിന്നെ ഹറമിലേക്കും അനുബന്ധ കെട്ടിടങ്ങളിലേക്കും ജലം പമ്ബ് ചെയ്യുകയെന്നും അണ്ടര്‍ സെക്രട്ടറി പറഞ്ഞു. അടുത്ത റമദാനില്‍ പദ്ധതി ഉപയോഗപ്പെടുത്താനാകുമെന്നും പുതിയ ജലസംഭരണിയുടെ നിര്‍മാണം പുരോഗമിക്കുന്നുവെന്നും അദ്ദേഹം പറഞ്ഞു .
