പെരുവന്താനം: ഉല്‍ക്കയെന്നു സംശയിക്കുന്ന ഖര പദാര്‍ഥം ആകാശത്തുനിന്ന് പതിച്ചത് നാട്ടുകാരില്‍ പരിഭ്രാന്തിക്കിടയാക്കി. പാരിസണ്‍ ഗ്രൂപ്പിന്‍റെ ഉടമസ്ഥതയിലുള്ള ബോയ്സ് എസ്റ്റേറ്റില്‍ ഇന്നലെ വൈകിട്ട് 6.30 ഓടെയാണ് അപൂര്‍വയിനം ഖരപദാര്‍ത്ഥം കണ്ടെത്തിയത്. ഇതിനു എട്ട് സെന്‍റിമീറ്റര്‍ നീളവും അഞ്ച് സെന്‍റിമീറ്റര്‍ വീതിയുമുണ്ട്. എസ്റ്റേറ്റിലൂടെ കടന്നുപോയ ഓട്ടോറിക്ഷയുടെ ഡ്രൈവര്‍ ജോസഫാണ് ആകാശത്തു നിന്നു എന്തോ പതിക്കുന്നതു കണ്ടത്. പീരുമേട് തഹസില്‍ദാര്‍ പി.എസ് വര്‍ഗീസും പെരുവന്താനം പോലീസും റവന്യു അധികൃതരും സ്ഥലത്തെത്തി പ്രാഥമിക പരിശോധന നടത്തി. സെസിലെ മുതിര്‍ന്ന ശാസ്ത്രജ്ഞര്‍ ഇന്നെത്തും.
