തൃപ്രയാര്‍: മോദിയെ പോലെ കപട വാഗ്ദാനങ്ങള്‍ നല്‍കുന്നയാളല്ല താനെന്നും നടപ്പാക്കാന്‍ കഴിയുമെന്നത് മാത്രമേ താന്‍ പ്രസംഗിക്കാറുള്ളുവെന്നും രാഹുല്‍ പറഞ്ഞു. മത്സ്യത്തൊഴിലാളികളടക്കമുള്ളവരുടെ ശബ്ദം പ്രധാനമന്ത്രി നരേന്ദ്ര മോദി കേള്‍ക്കുന്നില്ലെന്നും എന്നാല്‍ അംബാനിക്കും നീരവ് മോദിക്കുമൊക്കെ മോദിയോട് ഒരു കാര്യം പറയണമെങ്കില്‍ പത്തു സെക്കന്‍റിനുള്ളില്‍ സാധ്യമാകുമെന്നും അവരൊന്ന് മന്ത്രിച്ചാല്‍ പോലും മോദി അത് കേള്‍ക്കുമെന്നും കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി. തൃപ്രയാറില്‍ ദേശീയ മത്സ്യത്തൊഴിലാളി പാര്‍ലമെന്‍റില്‍ സംസാരിക്കുകയായിരുന്നു അദ്ദേഹം.
യുപിഎ അധികാരത്തില്‍ വന്നാല്‍ ഫിഷറീസ് മന്ത്രാലയം രൂപീകരിക്കുമെന്ന് രാഹുല്‍ ഗാന്ധി ഉറപ്പ് നല്‍കി. നിങ്ങളുടെ ശബ്ദം കേള്‍ക്കാന്‍ ഡല്‍ഹിയില്‍ ഒരു മന്ത്രാലയമുണ്ടാകുമെന്ന് രാഹുല്‍ ഉറപ്പുനല്‍കിയപ്പോള്‍ തൃപ്രയാര്‍ ടിഎസ്ജിഎ സ്റ്റേഡിയത്തില്‍ തിങ്ങിനിറഞ്ഞ മത്സ്യത്തൊഴിലാളികളടക്കമുള്ളവര്‍ കരഘോഷമുയര്‍ത്തി.
തൃപ്രയാര്‍ ടിഎസ്ജിഎ സ്റ്റേഡിയത്തില്‍ നടന്ന പാര്‍ലമെന്‍റില്‍ പ്രതിപക്ഷ നേതാവ് രമേശ് ചെന്നിത്തല, കെപിസിസി അധ്യക്ഷന്‍ മുല്ലപ്പള്ളി രാമചന്ദ്രന്‍, കോണ്‍ഗ്രസ് പ്രവര്‍ത്തക സമിതി അംഗങ്ങളായ ഉമ്മന്‍ ചാണ്ടി, കെ.സി.വേണുഗോപാല്‍, കേരളത്തിന്‍റെ ചുമതലയുള്ള ജനറല്‍ സെക്രട്ടറി മുകുള്‍ വാസ്നിക്, വി.എം.സുധീരന്‍ തുടങ്ങിയവര്‍ പങ്കെടുത്തു.
രാവിലെ 10.43-നാണ് പരന്പരാഗത വള്ളത്തിന്‍റെ മാതൃകയിലൊരുക്കിയ വേദിയിലേക്ക് രാഹുല്‍ എത്തിയത്. വിവിധ ഭാഷകളിലാണ് വിവിധ സംസ്ഥാനങ്ങളില്‍ നിന്നെത്തിയ പ്രതിനിധികള്‍ രാഹുലിനെ അഭിവാദ്യം ചെയ്ത് വരവേറ്റത്. ദേശീയ ഗാനത്തോടെ പാര്‍ലമെന്‍റിന് തുടക്കമായതോടെ സ്വാഗതവും അധ്യക്ഷനുമൊന്നുമില്ലാതെ നേരെ മത്സ്യതൊഴിലാളി നേതാക്കളുമായി രാഹൂല്‍ സംവാദത്തിലേര്‍പ്പെടുകയായിരുന്നു.
കര്‍ണാടകയിലെ പ്രതിനിധിയാണ് ആദ്യം സംവാദത്തില്‍ ചോദ്യമുന്നയിച്ചത്. തുടര്‍ന്ന് മഹരാഷ്ട്ര, ലക്ഷദ്വീപ്, ആന്ധ്ര, തമിഴ്നാട്, ഒഡീഷ, കേരളം എന്നിവടങ്ങളില്‍ നിന്നുള്ള പ്രതിനിധികളും ചോദ്യങ്ങളുന്നയിച്ചു. ഹിന്ദിയിലും ഇംഗ്ലീഷിലുമാണ് രാഹുല്‍ മറുപടി പറഞ്ഞത്.
