കൊച്ചി: കേരളത്തില്‍ കോണ്‍ഗ്രസിന്‍റെ തെരഞ്ഞെടുപ്പു പ്രചാരണങ്ങള്‍ക്കു തുടക്കമിടാന്‍ അധ്യക്ഷന്‍ രാഹുല്‍ ഗാന്ധി ഇന്നു കേരളത്തില്‍ എത്തും. സംസ്ഥാനത്തെ കോണ്‍ഗ്രസ് ബൂത്ത് പ്രസിഡന്‍റുമാരും വനിതാ വൈസ് പ്രസിഡന്‍റുമാരും പങ്കെടുക്കുന്ന മറൈന്‍ ഡ്രൈവിലെ സംഗമത്തില്‍ ഉച്ചകഴിഞ്ഞ് മൂന്നിന് അദ്ദേഹം പ്രസംഗിക്കും.ഉച്ചയ്ക്ക് ഒന്നിനു കൊച്ചി അന്താരാഷ്ട്ര വിമാനത്താവളത്തില്‍ രാഹുലിനെ കോണ്‍ഗ്രസ് നേതാക്കള്‍ സ്വീകരിക്കും.
അന്തരിച്ച എം.ഐ. ഷാനവാസിന്‍റെ വസതിയിലെത്തി കുടുംബാംഗങ്ങളെ കണ്ടശേഷം മൂന്നിനു മറൈന്‍ ഡ്രൈവിലെ സമ്മേളന പ്രതിനിധികളെ അഭിസംബോധന ചെയ്യും. സമ്മേളനത്തിനു ശേഷം എറണാകുളം ഗസ്റ്റ് ഹൗസില്‍ കോണ്‍ഗ്രസ് നേതാക്കളെ ഒരുമിച്ച്‌ കാണുന്ന രാഹുല്‍ ഗാന്ധി, ഒരുമണിക്കൂറോളം അവരുമായി ചെലവിടും. 4.50നാണു യുഡിഎഫ് നേതാക്കളുമായുള്ള ചര്‍ച്ച. 6.30നു ഡല്‍ഹിക്ക് മടങ്ങും.
