അബുദാബി: രാഹുല്‍ഗാന്ധിയുടെ യുഎഇ പര്യടനം വിജയിപ്പിക്കാന്‍ സംസ്ഥാനത്തെ നേതാക്കള്‍ കൂട്ടത്തോടെ ഗള്‍ഫിലേക്ക്. വരുന്ന വെള്ളിയാഴ്ചയാണ് കോണ്‍ഗ്രസ് അധ്യക്ഷന്‍റെ യുഎഇ പര്യടനം . ലോക്സഭാ തെരെഞ്ഞെടുപ്പിന്‍റെ പശ്ചാത്തലത്തില്‍ കോണ്‍ഗ്രസ് ദേശീയ അധ്യക്ഷന്‍ യുഎഇയില്‍ എത്തുമ്ബോള്‍ സന്ദര്‍ശനം വിജയിപ്പിക്കാനുള്ള ഒരുക്കത്തിലാണ് രാജ്യത്തെ പാര്‍ട്ടി അനുഭാവികള്‍.ഈ മാസം 11-ന് ദുബായ് ക്രിക്കറ്റ് സ്റ്റേഡിയത്തില്‍ നടക്കുന്ന പൊതുസമ്മേളനത്തില്‍ അരലക്ഷത്തിലേറെപേരെ പങ്കെടുപ്പിച്ച്‌ കൊണ്ട് കരുത്തുതെളിയിക്കുകയാണ് കോണ്‍ഗ്രസ് നേതാക്കളുടെ ലക്ഷ്യം. യുഎഇയിലെ എമിറേറ്റുകളിലെല്ലാം വന്‍ പങ്കാളിത്തമുള്ള സ്വാഗത സംഘയോഗങ്ങളും പ്രവര്‍ത്തക കണ്‍വെന്‍ഷനുകളും നടക്കുന്നുണ്ട്.എഐസിസി സെക്രട്ടറി ഹിമാന്‍ഷു വ്യാസ് പത്തു ദിവസത്തോളമായി ദുബായില്‍ ക്യാമ്ബ് ചെയ്ത് പ്രവര്‍ത്തകരെ ഏകോപിപ്പിക്കുന്നുണ്ട്. കേരളത്തില്‍ നിന്നാണ് ഏറ്റവും കൂടുതല്‍ നേതാക്കളെത്തിയത്. മുന്‍ മുഖ്യമന്ത്രി ഉമ്മന്‍ചാണ്ടി, കെപിസിസി പ്രചാരണസമിതി ചെയര്‍മാന്‍ കെ മുരളീധരന്‍, തിരുവഞ്ചൂര്‍ രാധാകൃഷ്ണന്‍, എം കെ രാഘവന്‍ എംപി തുടങ്ങിയവര്‍ ഇതിനകം എത്തിക്കഴിഞ്ഞു.
