തിരുവനന്തപുരം: ശ്രീനാരായണ ഗുരുവിനെ കേവലം ഒരു ഹിന്ദു സന്യാസിയായി ചുരുക്കിക്കാട്ടാനുള്ള ബി.ജെ.പിയുടെ ശ്രമം വര്‍ഗീയത വളര്‍ത്താനുള്ള അജണ്ടയുടെ ഭാഗമാണെന്ന് പ്രതിപക്ഷ നേതാവ് രമേശ് ചെന്നിത്തല.ശ്രീനാരായണ ഗുരു മഹാനായ ഹിന്ദു സന്യാസിയാണെന്ന ബി.ജെ.പി ഫേസ്ബുക്ക് പോസ്റ്റിലെ പരാമര്‍ശത്തിനെതിരെ ഫേസ്ബുക്കില്‍ കുറിച്ച മറുപടിയിലാണ് ഇങ്ങനെ പറഞ്ഞിരിക്കുന്നത്.
മതങ്ങള്‍ക്കതീതമായ ആത്മീയതയാണ് ഗുരുദര്‍ശനങ്ങളുടെ അടിത്തറ.ആ ഗുരുവിനെ വെറും ഒരു ഹിന്ദു സന്യാസിയായി സംഘപരിവാറിന്റെ കൂടാരത്തിലെത്തിക്കാനുള്ള ബി.ജെ.പിയുടെ ശ്രമം അപഹാസ്യമാണ്.
തിരുവോണത്തെ വാമന ജയന്തിയാക്കിയത് പോലുള്ള വക്ര ബുദ്ധിയാണ് ഇവിടെയും പ്രവര്‍ത്തിക്കുന്നത്. എല്ലാ മതങ്ങളുടെയും സാരാംശം ഒന്നാണെന്ന് കണ്ടറിഞ്ഞ ഗുരുദേവനെ തങ്ങളുടെ മാത്രം ആളാക്കി രാഷ്ട്രീയ നേട്ടം കൊയ്യാനുള്ള ബി.ജെ.പി. ശ്രമം കേരളീയ സമൂഹം അംഗീകരിക്കില്ലെന്നും ചെന്നിത്തല വ്യക്തമാക്കി.
കെ.പി.സി.സി പ്രസിഡന്റ് വി.എം സുധീരനും ബി.ജി.പിയുടെ പോസ്റ്റിനെതിരെ രംഗത്തെത്തിയിട്ടുണ്ട്.
