തിരുവനന്തപുരം: ശബരിമലയിലെ യുവതീ പ്രവേശന വിഷയത്തില്‍ സുപ്രീംകോടതിയെ കബളിപ്പിക്കാന്‍ സംസ്ഥാന സര്‍ക്കാര്‍ ശ്രമിച്ചുവെന്നും ഇത് ലജ്ജാകരമാണെന്നും പ്രതിപക്ഷ നേതാവ് രമേശ് ചെന്നിത്തല. അയ്യപ്പഭക്തരുടെ വികാരം വൃണപ്പെടുത്താനാണ് സര്‍ക്കാര്‍ ആവര്‍ത്തിച്ചു ശ്രമിക്കുന്നതെന്നു പറഞ്ഞ ചെന്നിത്തല സുപ്രീംകോടതിയില്‍ തെറ്റായ വിവരം നല്‍കി ശബരിമല വിഷയം ആളിക്കത്തിച്ച്‌ സംഘര്‍ഷം നിലനിര്‍ത്താനുള്ള ഹീനശ്രമമാണ് സര്‍ക്കാര്‍ നടത്തുന്നതെന്നും തുറന്നടിച്ചു.
തന്‍റെ ഫേസ്ബുക്ക് പേജിലാണ് പ്രതിപക്ഷ നേതാവ് സര്‍ക്കാരിനെതിരെ രൂക്ഷ വിമര്‍ശനം നടത്തിയത്. ജനാധിപത്യപരമായി തിരഞ്ഞെടുക്കപ്പെട്ട ഒരു സര്‍ക്കാരിന് ചേര്‍ന്ന നടപടിയല്ല ഇതെന്നും ചെന്നിത്തല കുറിച്ചു. സുപ്രീംകോടതി വിധിക്ക് ശേഷം 50 വയസിന് താഴെയുള്ള 51 സ്ത്രീകള്‍ ശബരിമലയില്‍ ദര്‍ശനം നടത്തിയെന്നാണ് സുപ്രീംകോടതിയില്‍ സര്‍ക്കാര്‍ ലിസ്റ്റ് നല്‍കിയത്. പക്ഷേ, ഈ സ്ത്രീകളെ മാധ്യമങ്ങള്‍ നേരിട്ട് ബന്ധപ്പെട്ടപ്പോള്‍ അവര്‍ക്ക് അന്‍പത് വയസ്സില്‍ കൂടുതല്‍ പ്രായമുണ്ടെന്നാണ് തെളിഞ്ഞത്. ഇക്കാര്യം വ്യക്തമായ സ്ഥിതിക്ക് സുപ്രീംകോടതിയില്‍ എന്തിന് തെറ്റായ വിവരം നല്‍കി എന്നതിന് മുഖ്യമന്ത്രി മറുപടി നല്‍കണം- അദ്ദേഹം ആവശ്യപ്പെട്ടു.
സുപ്രീംകോടതിയില്‍ സര്‍ക്കാര്‍ ഒരു വിവരം നല്‍കുമ്ബോള്‍ അത് പൂര്‍ണ്ണമായും സത്യസന്ധമാകേണ്ടതുണ്ട്. തെറ്റായ വിവരം കോടതിക്ക് നല്‍കുക വഴി അക്ഷന്തവ്യമായ തെറ്റാണ് സര്‍ക്കാര്‍ ചെയ്തിരിക്കുന്നതെന്നും ചെന്നിത്തല കുറ്റപ്പെടുത്തി. ശബരിമല വിഷയത്തില്‍ തുടക്കം മുതലേ സര്‍ക്കാര്‍ നടത്തുന്ന കള്ളകളിയുടെ തുടര്‍ച്ചയാണിതെന്നും കൂട്ടിച്ചേര്‍ത്താണ് അദ്ദേഹം തന്‍റെ പോസ്റ്റ് അവസാനിപ്പിച്ചിരിക്കുന്നത്.
