2019 മാർച്ച് 31-ാം തീയതി നടത്തിയ സ്റ്റേറ്റ് എലിജിബിലിറ്റി ടെസ്റ്റിന്റെ ഫലം പ്രസിദ്ധീകരിച്ചു. www.prd.kerala.gov.in, www.lbscentre.kerala.gov.in എന്നീ വെബ് സൈറ്റുകളിൽ ഫലം ലഭ്യമാണ്. ആകെ 15046 പേർ പരീക്ഷ എഴുതിയതിൽ 2200 പേർ വിജയിച്ചു. ആകെ വിജയശതമാനം 14.62 ആണ്. പാസ്സായവരുടെ ലിസ്റ്റിൽ ഉൾപ്പെട്ടിട്ടുളളവർ അവരുടെ സെറ്റ് സർട്ടിഫിക്കറ്റുകൾ ലഭിക്കുന്നതിനുളള അപേക്ഷാഫോറം എൽ.ബി.എസ് സെന്ററിന്റെ വെബ് സൈറ്റിൽ നിന്നും ഡൗൺലോഡ് ചെയ്ത് പൂരിപ്പിച്ച് ആവശ്യമായ രേഖകളുടെ (ഗസറ്റഡ് ഓഫീസർ സാക്ഷ്യപ്പെടുത്തിയ) കോപ്പികൾ, 40 രൂപയുടെ സ്റ്റാമ്പ് ഒട്ടിച്ച് സ്വന്തം മേൽവിലാസം എഴുതിയ A4 വലിപ്പത്തിലുളള ക്ലോത്ത് ലൈൻസ് കവർ സഹിതം ഡയറക്ടർ എൽ.ബി.എസ് സെന്റർ ഫോർ സയൻസ് ആന്റ് ടെക്‌നോളജി, പാളയം, തിരുവനന്തപുരം-33 എന്ന വിലാസത്തിൽ അയച്ചുതരണം.
എസ്.എസ്.എൽ.സി സർട്ടിഫിക്കറ്റിൽ പേര് ഉൾപ്പെടുന്ന പേജ്, ബിരുദാനന്തരബിരുദ സർട്ടിഫിക്കറ്റ്(പ്രൊവിഷണൽ/ഒറിജിനൽ), മാർക്ക്‌ലിസ്റ്റ്/ഗ്രേഡ് കാർഡ്, ബി.എഡ്. സർട്ടിഫിക്കറ്റ് (പ്രൊവിഷണൽ/ഒറിജിനൽ), അംഗീകാര തുല്യത സർട്ടിഫിക്കറ്റുകൾ (കേരളത്തിനു പുറത്തുളള ബിരുദാനന്തര ബിരുദത്തിനും, ബി.എഡിനും), പ്രോസ്‌പെക്ടസിലെ ഖണ്ഡിക 2.2ൽ പറഞ്ഞിട്ടില്ലാത്ത വിഷയങ്ങളിൽ ബിരുദാനന്തര ബിരുദം നേടിയവർ തങ്ങളുടെ വിഷയങ്ങളുടെ അംഗീകാര തുല്യതാ സർട്ടിഫിക്കറ്റ്, ഒ.ബി.സി (നോൺ ക്രിമീലെയർ) വിഭാഗത്തിൽ അപേക്ഷ നൽകി വിജയിച്ചവർ അസൽ നോൺ ക്രീമീലെയർ സർട്ടിഫിക്കറ്റ് (31/01/2018 മുതൽ 17/02/2019 വരെയുളള കാലയളവിൽ ലഭിച്ചത്). എസ്.സി/എസ്.റ്റി,പി.എച്ച്/വി.എച്ച് വിഭാഗത്തിൽ അപേക്ഷ നൽകി വിജയിച്ചവർ അവരുടെ ജാതി/വൈകല്യം തെളിയിക്കുന്ന (ഗസറ്റഡ് ഓഫീസർ സാക്ഷ്യപ്പെടുത്തിയ) ബന്ധപ്പെട്ട രേഖകൾ. (മുൻപ് ഹാജരാക്കിയവർക്ക് ബാധകമല്ല.) എന്നിവയാണ് രേഖകൾ. അസൽ സർട്ടിഫിക്കറ്റുകൾ സെപ്തംബർ മുതൽ വിതരണം ചെയ്യും. കൂടുതൽ വിവരങ്ങൾക്ക് 0471-2560311, 312, 313, 314.
