റായ്പൂര്‍ • ഛത്തീസ്ഗഡിലെ ജഗ്ദല്‍പൂരില്‍ മലയാളി സിആര്‍പിഎഫ് ജവാനെ വെടിയേറ്റു മരിച്ച നിലയില്‍ കണ്ടെത്തി. സിആര്‍പിഎഫിന്റെ കോബ്ര യൂണിറ്റില്‍ അംഗമായിരുന്ന തിരുവനന്തപുരം സ്വദേശി ബിജു കുമാര്‍ ടി.എസ് ആണ് മരിച്ചത്. അദ്ദേഹം സര്‍വീസ് തോക്ക് ഉപയോഗിച്ച്‌ സ്വയം വെടിവയ്ക്കുകയായിരുന്നുവെന്ന് സൈന്യം അറിയിച്ചു. ബസ്തര്‍ ജില്ലയിലെ ജഗ്ദല്‍പൂരിലുള്ള സിആര്‍പിഎഫ് ക്യാംപില്‍ ഉച്ചയ്ക്ക് 1.40 ഒാടെ ബിജു കുമാറിനെ രക്തത്തില്‍ കുളിച്ച നിലയില്‍ കണ്ടെത്തുകയായിരുന്നു. എന്താണ് ആത്മഹത്യയ്ക്ക് പിന്നിലെ കാരണമെന്ന് വ്യക്തമല്ല. സംഭവത്തില്‍ സിആര്‍പിഎഫ് അന്വേഷണം പ്രഖ്യാപിച്ചു.
