കോഴിക്കോട്: കൊടകര കുഴല്‍പ്പണ കേസിൽ സി.കെ. ജാനുവിനെ എന്‍.ഡി.എ സ്ഥാനാര്‍ഥിയായി മത്സരിപ്പിക്കാന്‍ പണം നല്‍കിയെന്ന ആരോപണം ഉന്നയിച്ച ജെ.ആര്‍.പി ട്രഷറര്‍ പ്രസീതയും ബി.ജെ.പി സംസ്ഥാന അധ്യക്ഷന്‍ കെ. സുരേന്ദ്രനും തമ്മിലുള്ള വാട്സ്ആപ് ചാറ്റ് പുറത്ത്. ജാനുവുമായി സംസാരിക്കാന്‍ ഇടനിലക്കാരുടെ ആവശ്യമില്ലെ ന്നായിരുന്നു സുരേന്ദ്രന്‍റെ വാദം. എന്നാല്‍ സുരേന്ദ്രന്‍റെ വാദത്തെ പൊളിക്കുന്നതാണ് വാട്സ്ആപ് സന്ദേശങ്ങള്‍.
ഇതോടെ സി.കെ. ജാനുവിന് പണം കൈമാറുന്നതിന് ഇടനിലക്കാരിയായി സുരേന്ദ്രനുമായി സംസാരിച്ചത് പ്രസീത യാണെന്ന് തെളിക്കുന്നതാണ് ചാറ്റുകള്‍. ഫെബ്രുവരി 24, 26 എന്നീ ദിവസങ്ങളില്‍ നടത്തിയ ചാറ്റുകളുടെ സ്ക്രീന്‍ ഷോട്ടാണ് പുറത്തുവന്നത്.
എന്‍.ഡി.എയില്‍ ചേരാന്‍ സി.കെ. ജാനുവിന് സുരേന്ദ്രന്‍ പത്തുലക്ഷം നല്‍കിയെന്നായിരുന്നു പ്രസീതയുടെ ആരോപണം. സുരേന്ദ്രന്‍റെ കൈയില്‍നിന്ന് തിരുവനന്തപുരത്തെ ഹോട്ടലില്‍വെച്ച്‌ ജാനു പണം വാങ്ങിയെന്നും കൂടാതെ തെരഞ്ഞെടുപ്പ് ചെലവിന് ലഭിച്ച തുകയും വ്യക്തിഗത ആവശ്യത്തിനായി വകമാറ്റിയെന്നും പ്രസീത ആരോപിക്കുകയായിരുന്നു. എന്നാല്‍ പ്രസീതയെ തള്ളി സി.കെ. ജാനു രംഗത്തെത്തിയിരുന്നു.
പ്രസീതക്കെതിരെ മാനനഷ്ടകേസ് നല്‍കുമെന്നും പണം വാങ്ങിയതിന്‍റെ തെളിവുകള്‍ പുറത്തുവിടണമെന്നും ഹോട്ടലിലെ സി.സി.ടി.വി ദൃശ്യങ്ങളടക്കം പരിശോധിക്കാന്‍ തയാറാണെന്നുമായിരുന്നു ജാനുവിന്‍റെ വെല്ലുവിളി.
ആരോപണങ്ങള്‍ക്കെതിരെ കെ. സുരേന്ദ്രനും രംഗത്തെത്തിയിരുന്നു. ജാനുവിന് സ്വന്തം ആവശ്യത്തിനായി പണം നല്‍കിയിട്ടില്ലെന്നും തെരഞ്ഞെടുപ്പ് ആവശ്യങ്ങള്‍ക്ക് പണം നല്‍കിയിട്ടുണ്ടെന്നുമായിരുന്നു സുരേന്ദ്രന്‍റെ പ്രതികരണം. കൂടാതെ ജാനുവുമായി സംസാരിക്കാന്‍ ഇടനിലക്കാരുടെ ആവശ്യമില്ലെന്നും ബി.ജെ.പിക്കെ തിരെയും സി.കെ. ജാനുവിനെതിരെയും അസത്യപ്രചാരണങ്ങളുമാണ് നടക്കുന്നതെന്നും സുരേന്ദ്രൻ ആരോപിച്ചിരുന്നു.
