മുംബൈ: ബോളിവുഡിലെ എക്കാലത്തെയും മികച്ച ചിത്രങ്ങളില്‍ ഒന്നായ ഷോലെയിലെ കാലിയ എന്ന കൊള്ളക്കാരന്റെവേഷത്തിലൂടെ പ്രശസ്തനായ നടന്‍ വിജു ഖോട്ടെ (78) അന്തരിച്ചു. തിങ്കളാഴ്ച വെളുപ്പിനായിരുന്നു അന്ത്യം. ഹൃദയാഘാതമാണ് മരണകാരണം. കുറച്ചുനാളായി രോഗബാധിതനായിരുന്നു.
ഹിന്ദിയിലും മറാത്തിയിലുമായി മുന്നൂറിലേറെ ചിത്രങ്ങളില്‍ അഭിനയിച്ചിട്ടുണ്ട്. ഷോലെയിലെ കൊള്ളക്കാരന്‍ കാലിയക്ക് പുറമെ അന്ദാസ് അപ്‌ന അപ്‌നയിലെ റോബര്‍ട്ട് എന്ന വേഷവും ഏറെ ശ്രദ്ധേയമായിരുന്നു. ഖയാത്ത് സെ ഖയാമത്ത് തക്ക്, വെന്റിലേറ്റർ എന്നിവയിലും ശ്രദ്ധേയമായ വേഷങ്ങള്‍ ചെയ്തു.
ടെലിവിഷന്‍ ഷോയായ സബാനിലും അഭിനയിച്ചിട്ടുണ്ട്. ഏറെക്കാലം മറാത്തി നാടകവേദിയില്‍ സജീവമായി നിന്ന ശേഷമാണ് ചലച്ചിത്രരംഗത്തെത്തിയത്. നിശബ്ദസിനമയുടെ കാലത്ത് സജീവമായിരുന്ന നടന്‍ നന്ദു ഖോട്ടെയുടെ മകനാണ്. നടി ശുഭ ഖോട്ടെ സഹോദരിയാണ്.
