എല്ലാ വർഷവും മാർച്ച് 22 നാണ് ലോക ജലദിനമായി ആചരിക്കുന്നത്.ജലം ഓരോ തുള്ളിയും സൂക്ഷിച്ച് ഉപയോഗിക്കേണ്ടതിന്റെ ആവശ്യകതയെ ലോകജനത മനസിലാക്കുകയാണ് ജല ദിനാചരണത്തിന്റെ ലക്ഷ്യം.
അടുത്ത മഹായുദ്ധം നടക്കാൻ പോകുന്നത് കുടിവെള്ളത്തിന് വേണ്ടിയായിരിക്കും എന്നൊരു പറച്ചിലുണ്ട്. കുടിവെള്ളത്തിന് സ്വർണത്തേക്കാൾ വിലവരുന്ന കാലത്തേക്ക് ലോകം മാറികൊണ്ടിരിക്കുന്നു. ജനസംഖ്യ വർദ്ധിക്കുകയും ഭൂമിയിൽ ജലം കുറയുകയും ചെയ്യുന്ന സ്ഥിതി വരാൻ പോകുന്നു. ഇന്ത്യ ഉൾപ്പെടെയുള്ള രാജ്യങ്ങൾ കടുത്ത ജലക്ഷാമം അനുഭവപ്പെടുന്ന രാജ്യങ്ങളുടെ പട്ടികയിലേക്ക് നീങ്ങുന്നു. കുടിവെള്ള സ്രോതസ്സുകളെല്ലാം ദിനം പ്രതി മലിനമായിക്കൊണ്ടിരിക്കുകയാണ്. മഹാനദികൾ ഇന്ന് മാലിന്യക്കൂമ്പാരങ്ങളാണ്. കിണറുകളും കുളങ്ങളും രാസവസ്തുക്കളാലും ഖരമാലിന്യങ്ങളാലും അന്യമായി മാറുന്നു. ലോക ജലദിനത്തിൽ ഓർമ്മിക്കപ്പെടേണ്ട വസ്തുതകൾ ഇവയെല്ലാമാണ്.
ലോകജല ദിനമെന്ന നിർദ്ദേശം ആദ്യമായി ഉയർന്നുവന്നത് 1992ൽ ബ്രസീലിലെ റിയോ ഡി ജനീറോയിൽ ചേർന്ന യുഎൻ കോൺഫറൻസ് ഓൺ എൻവിറോൺമെൻറ് ഡെവലപ്മെൻറ് സമ്മേളനത്തിലാണ്. തുടർന്ന് യുഎൻ ജനറൽ അസംബ്ലി 1993ൽ ലോക ജലദിനം ആചരിക്കുവാൻ തീരുമാനിച്ചു. അങ്ങനെ 1993 മാർച്ച് 22 ന് ലോക ജലദിനം ആദ്യമായി ലോകമെങ്ങും ആഘോഷിച്ചു.ശുദ്ധജലം ശുചിത്വം എന്നിവയുടെ ലഭ്യതയും സുസ്ഥിര വികസനവും ലക്ഷ്യംവച്ചാണ് യുഎൻ വേൾഡ് വാട്ടർ ഡെവലപ്മെൻറ് ഓരോ വർഷവും ജലദിനം ആഘോഷിക്കുന്നത്.ലോകജലദിനം വിവിധ പരിപാടികളോടെ ലോകമെമ്പാടും ആഘോഷിക്കുന്നു
